Любоў Лунёву з Акрэсціна забрала хуткая дапамога
Журналістку-фрылансера, якая супрацоўнічае з тэлеканала «Белсат» – Любоў Лунёву ўначы з Цэнтра ізаляцыі правапарушальнікаў у 1-м завулку Акрэсціна ў Менску забрала хуткая дапамога, паведаміла Беларуская асацыяцыя журналістаў.
У дасведчанай журналісткі ў міліцэйскім пастарунку адабралі тэлефон, таму цяжка было даведацца пра стан здароўя Любові Лунёвай. Пра гэта ў нашым ранішнім эфіры паведаміў намеснік старшыні Беларускай асацыяцыі журналістаў Барыс Гарэцкі:
– Рэпарцёрка – яна, можна сказаць, карыфей вулічнай журналістыкі, рэпарцёрства Беларусі. Яна два дзесяцігоддзі асвятляе розныя пратэсты і акцыі, адсідкі, Акрэсціна, ізалятары. Яна была і на Акрэсціна адразу пасля маршу. Іх хуценька аформілі і адвезлі ў ізалятар, але пасля ноччу прыйшло паведамленне, што яе вывезлі на хуткай дапамозе а палове першай гадзіны ночы. Тэлефон у Лунёвай забралі ў аддзяленні міліцыі, і адпаведна яе вызвалілі без тэлефона.
Днём 7 снежня Лунёву і аператара Івана Куракевіча затрымалі падчас працы на традыцыйным панядзелкавым маршы пенсіянераў. Пасля складання пратаколаў пра ўдзел у несанкцыянаваным масавым мерапрыемстве іх даставілі ў ЦІП да суда.
Беларускае Радыё Рацыя
Глядзіце таксама
