Маргарыту Шышу адлічылі з Гарадзенскага ўніверсітэта
Адлічана з гарадзенскага Купалаўскага ўніверсітэта адна з актывістак пратэстнага руху Маргарыта Шыша. Яна вучылася на чацвёртым курсе факультэта мастацтва і дызайна.
Пасля лекцыйнай пары ёй перадалі ў дэканаце дакументы. Пра сваё цвёрдае рашэнне падтрымліваць пратэсты Маргарыта не шкадуе. Яна мае надзею, што студэнты прадоўжаць акцыі падтрымкі страйкаў и выступы супраць гвалту і несправядлівых выбараў.
– Так, магчыма за нейкі перыяд адлічэнне аднаго чалавека, або некалькіх студэнтаў, мы яшчэ дакладна не ведаем колькі адлічана. Гэта, відаць, неяк спыніць пратэст людзей. Але з іншага боку, для другіх людзей гэта толькі дадасць злосці і яны зноў выйдуць. Я спадзяюся, што ёсць людзі, якія ўсё яшчэ не баяцца і будуць працягваць выходзіць чаго б гэта ім не каштавала.
Маргарыта пераканана, што факты несправядлівасці ў краіне трэба агучваць і крытыкаваць, а не ўтойваць, як гэта было ўсё яе жыццё ў асяроддзі дарослых знаёмых і сваякоў, якія ніколі не падымалі раней адкрыта палітычныя і сацыяльныя праблемы.
Якуб Сушчынскі, Беларускае Радыё Рацыя
