Мікола Папека змагаецца за беларускую мову
Паэт-пчаляр з Пружаншчыны Мікола Папека не пагадзіўся знаёміцца са сваёй крымінальнай справай, напісанай на расейскай мове.
Папека з самага пачатку патрабаваў, каб справа вялася на беларускай мове. З цяжкасцю следчыя пагаджаліся на гэта, але ў выніку справа ўсё роўна аказалася на расейскай мове. Закон аб дзвюх дзяржаўных мовах не працуе, – кажа Мікола Папека:
– Закон абавязвае ведаць беларускую мову ў дастатковым аб’ёме, каб кантактаваць з тымі людзьмі, якія патрабуюць, каб мова функцыянавала. Я праходжу па так званай “карагоднай справе” ў Берасці. З самага пачатку я пачаў патрабаваць, каб усе дакументы былі па-беларуску, з цяжкасцю дамагаўся гэтага. Але мне вырашылі ўручыць справу для азнаямлення на расейскай мове. Вядома, я ад гэтага адмовіўся. Цікава, як растлумачаць начальнікі, калі яны мне адмовяць у законнасці азнаёміцца са справай на беларускай мове.
Паэта-пчаляра Міколу Папеку абвінавачваюць ва ўдзеле ў вулічнай акцыі 13 верасня ў Берасці. Калі людзі спявалі і танчылі на скрыжаванні праспекта Машэрава і бульвара Шаўчэнкі. Ніякай шкоды не нанесена. Людзей вылічваюць па камерах відэаназірання. Ужо асуджаныя на розныя тэрміны зняволення і пакараныя вялікімі штрафамі першыя два дзясяткі ўдзельнікаў. Мікола Папека ідзе ў чацвёртай дзясятцы.
Беларускае Радыё Рацыя
Глядзіце таксама
