Міліцыя пакрывае мастака-хулігана, які малюе Пуціна?
У Гародні рамеснік пабіў планшэт грамадскаму актывісту Сяргею Верамеенку за тое, што ён здымаў на відэа яго партрэты з выявамі расейскіх дыктатараў.
Агрэсіўныя дзеянні ў адносінах да актывіста ажыццявілі двое рамеснікаў у зоне відэаназірання на вуліцы Савецкай. Калі быў выкліканы міліцыянт і пачалася праверка, то высветлілася, што відэа знікла, а адбіткаў пальцаў хулігана на планшэце не выяўлена, кажа Сяргей Верамеенка:
– Там чамусьці няма гэтага відэа. Дакладней відэа ёсць, але там нічога не бачна. Як нічога не бачна, калі наша штурханіна праходзіла пад камерай вонкавага назірання на вуліцы Савецкай. Я ўжо звярнуўся ў пракуратуру. Тэрміны для правядзення праверкі не былі выкананы згодна з заканадаўствам, яны зацягнуліся. Думаю, што на гэтай падставе буду падаваць яшчэ не адну скаргу. Калі мы знаходзіліся пад камерай і нічога не бачна, то гэта проста абсурд.
Цалкам гутарку слухайце ў далучаным файле:
Сяргею Верамеенку пабілі планшэт 7-га сакавіка гэтага году. З таго часу вырабы майстроў на расейскую ды імперскую тэматыку працягваюць прадавацца.
Беларускае Радыё Рацыя, Гародня
