Міліцыянты не дазволілі спаліць «карупцыю» і «бюракрата»
У берасцейскім Парку воінаў інтэрнацыяналістаў супрацоўнікі міліцыі і АМАПу канфіскавалі ў жыхара горада Віталя Казака пудзілы “бюракрата” і “карупцыі”. Грамадскі актывіст спрабаваў паднесці іх да вогнішча на Масленіцы і спаліць.
Менавіта на гэтыя заганы нашай рэчаіснасці трэба звяртаць найбольшую ўвагу і адпраўляць іх у нябыт, лічыць Віталь Казак:
— Столькі часу ўсім усё было абыякава і цярпенне папросту лопнула. Я жыву ў гэтай краіне, грамадзянін гэтай краіны, у мяне тут жонка, сын і нікуды з гэтай краіны я з’язджаць не збіраюся, і хачу, каб у маёй краіне былі парадак і законнасць.
Грамадскага актывіста доўга ў службовым аўтамабілі не трымалі і неўзабаве адпусцілі. Міліцыянты паведамілі што пудзілы аддадуць пазней, бо з імі актывіст перашкаджае святу. Нічога ганебнага ў маіх памкненнях я не бачу, — зазначае Віталь Казак.
Мікола Ляшкевіч, Беларускае Радыё Рацыя, Берасце
Фота: Еўрарадыё
