Мінюст зарэгістраваў «Гавары праўду»
Палітычным рашэннем уладаў назвала рэгістрацыю рэспубліканскага даследча-асветнага грамадскага аб’яднання „Гавары праўду” сустаршыня гэтай арганізацыі Таццяна Караткевіч.
„Гэта менавіта палітычнае рашэнне. Да гэтага мы безвынікова шэсць разоў падавалі дакументы на рэгістрацыю, хоць памылкі было лёгка ліквідаваць”, — заявіла яна 16 мая на прэс-канферэнцыі ў Менску.
Іншы сустаршыня „Гавары праўду” Андрэй Дзмітрыеў лічыць, што рэгістрацыя аб’яднання з’яўляецца спробай уладаў „утрымаць дыялог з Захадам”. „Гэта ў цэлым добрая тэндэнцыя, калі ідзе хваля лібералізацыі, калі робіцца лягчэй”, — сказаў ён.
Паводле слоў Дзмітрыева, пасля арыштаў па справе „Белага легіёна” здавалася, што лібералізацыя ў краіне скончылася. „Але цяпер мы бачым, што пазітыўныя дзеянні з боку ўлады могуць працягвацца”, — дадаў ён.
Рэгістрацыя „Гавары праўду”, адзначыў Дзмітрыеў, важная для актывістаў аб’яднання, бо захоўвае іх бяспеку, абараняе ад небяспекі прыцягнення да адказнасці ад імя незарэгістраванай арганізацыі. „Хочацца верыць, што гэта не адзіны крок у напрамку лібералізацыі і правядзення рэформаў”, — сказаў палітык.
Пры гэтым ён падкрэсліў, што рэгістрацыя „Гавары праўду” не была прадметам змовы з уладамі. „Кампанія вылучала двух кандыдатаў у прэзідэнты, дзясяткі кандыдатаў у дэпутаты парламента. „Гавары праўду” з’яўляецца ўжо прызнанай арганізацыяй. Рэгістрацыя — гэта відавочнае прызнанне нас, хоць яно і запозненае. Але гэта выдаткі палітычнай сістэмы Беларусі. Спадзяемся, што і іншыя арганізацыі, якія хочуць рэгістрацыі, яе атрымаюць”, — заявіў Дзмітрыеў.
Таццяна Караткевіч нагадала, што мэта „Гавары праўду” — абарона дэмакратычных каштоўнасцяў. „Гэта гістарычны момант — атрыманне пасведчання аб рэгістрацыі. Гэта перамога”, — падкрэсліла яна.
Грамадзянская кампанія „Гавары праўду” была створаная ў пачатку 2010 года з мэтай спрыяць „ўсведамленню беларускім грамадствам рэальнага становішча ў краіне, дзе мала праўды і шмат хлусні”. У тым жа годзе кіраўнік кампаніі Уладзімір Някляеў быў вылучаны кандыдатам у прэзідэнты Беларусі. Някляеў кіраваў кампаніяй „Гавары праўду” да пачатку красавіка 2015 года, калі абвясціў пра выхад з апазіцыйных структур у сувязі з безвыніковасцю двухгадовых перамоў па вылучэнні адзінага дэмакратычнага кандыдата ў прэзідэнты і вызначэнні сумеснай праграмы на прэзідэнцкія выбары 2015 года.
28 мая 2015 года на рэспубліканскім сходзе актыву „Гавары праўду” старшынёй кампаніі быў абраны Андрэй Дзмітрыеў, а кандыдатам у прэзідэнты на выбарах 2015 года ад кампаніі вылучылі Таццяну Караткевіч. Цяпер Дзмітрыеў і Караткевіч з’яўляюцца сустаршынямі арганізацыі.
Кампанія „Гавары праўду” рабіла шэсць безвыніковых спробаў афіцыйна зарэгістраваць арганізацыю ў Міністэрстве юстыцыі: у 2010, 2011, 2013, 2015 гадах і двойчы ў 2016-м. У „Гавары праўду” лічаць адмовы ў рэгістрацыі „палітычна матываванымі”.
