Мінздароўя выдала дазвол на ўвоз і прымяненне вакцыны «КавіВак»
Міністэрства аховы здароўя Беларусі выдала дазвол на ўвоз і прымяненне вакцыны «КавіВак» супраць COVID-19, паведамляе прэс-служба Міністэрства аховы здароўя.
Удакладняецца, што гэтая вакцына інактываваная цэльнавірыённая канцэнтраваная вычышчаная, прызначана для папярэджання і ліквідацыі наступстваў эпідэмічных захворванняў. Вытворца вакцыны — Федэральны навуковы цэнтр даследаванняў і распрацоўкі імунабіялагічных прэпаратаў імя М.П. Чумакова РАН (Расейская Федэрацыя). Дакументы, прадстаўленыя вытворцам, прайшлі адпаведную экспертызу. Яны адпавядаюць усім патрабаванням заканадаўства Беларусі і былі ацэнены станоўча.
У прэс-службе дадалі: вакцына «КавіВак» распрацавана па тым жа прынцыпе, што і класічныя вакцыны ад воспы, поліяміеліту, адзёру і іншых вірусаў. Навукоўцы адзначаюць, што вакцынацыя «Кавівакам» часцей пераносіцца больш лёгка, чым «Спадарожнікам V».
Вакцына зарэгістраваная ў Расеі ў канцы лютага 2021 года. У яе аснове — інактываваны вірус SARS-CoV-2. Такая ж платформа выкарыстоўваецца ў двух кітайскіх вакцынах — Sinopharm і Sinovac. Дарэчы, вакцына кампаніі Sinopharm шырока прымяняецца для вакцынацыі на тэрыторыі Беларусі.
Вакцына «КавіВак» паступіла 6 снежня на аптэчны склад і з 13-15 снежня больш за 300 тыс. доз ужо адпраўлены ва ўсе вобласці Беларусі.
