Мітрапаліт Тадэвуш Кандрусевіч адзначае 70-годдзе
3 студзеня кіраўніку беларускага касцёла спаўняецца 70 гадоў. Непасрэдна ў дзень свайго нараджэння іерарх будзе цэлебраваць дзве імшы ў архікатэдральным касцёле — у 11.30 і 13.00, паведамляе сайт catholic.by.
У менскім архікатэдральным касцёле імя Найсвяцейшай Панны Марыі 2 студзеня прайшла святая імша з нагоды юбілею мітрапаліта Менска-Магілёўскага арцыбіскупа Тадэвуша Кандрусевіча. Тадэвуш Кандрусевіч нарадзіўся 3 студзеня 1946 года ў вёсцы Адэльск непадалёк Гародні. Скончыўшы сярэднюю школу, Кандрусевіч паступіў на фізіка-матэматычны факультэт Гродзенскага педагагічнага інстытута, адкуль праз год вымушаны быў сысці ў сувязі з абвінавачаннямі ў тым, што ён рэгулярна наведвае касцёл і ўдзельнічае ў набажэнствах. У 1964 годзе Кандрусевіч паступіў на энергамашынабудаўнічы факультэт Ленінградскага політэхнічнага інстытута, які скончыў з адзнакай, атрымаўшы дыплом інжынера-механіка. Пасля заканчэння ўніверсітэта да 1976 года працаваў інжынерам на Віленскім заводзе шліфавальных станкоў. У 1976 годзе Кандрусевіч паступіў у духоўную семінарыю ў Коўна, скончыў яе ў 1981 годзе і быў пасвечаны ў духоўны сан. У 1985 годзе ён атрымаў ступень ліцэнцыята тэалогіі, у 1988-м — абараніў дысертацыю і атрымаў навуковую ступень доктара тэалогіі. У ліпені 1989 года папа рымскі Ян Павел ІІ прызначыў Тадэвуша Кандрусевіча апостальскім адміністратарам Менскай дыяцэзіі. У Беларусі біскуп Кандрусевіч заснаваў Гарадзенскую вышэйшую духоўную семінарыю, садзейнічаў вяртанню вернікам і адкрыццю больш чым 100 раней закрытых касцёлаў, выданню „Парадку імшы” і „Катэхізіса” на беларускай мове. У 2002 годзе ён быў прызначаны мітрапалітам кафедры Маці Божай у Маскве, а ў верасні 2007-га — кіраўніком Менска-Магілёўскай архідыяцэзіі Рымска-каталіцкай царквы. Тадэвуш Кандрусевіч валодае беларускай, рускай, польскай, англійскай і італьянскай мовамі.
Глядзіце таксама
