МУС пачне крымінальныя справы на беларусаў, якія ваююць на Данбасе
Міністэрства ўнутраных спраў пачне крымінальныя справы на беларусаў, якія ваююць на Данбасе па абодва бакі фронту. Пра гэта 19 лістапада паведаміў журналістам кіраўнік МУС Ігар Шуневіч.
„Ёсць рэальныя праверачныя матэрыялы. Лагічным іх завяршэннем бліжэйшым часам будуць крымінальныя справы па адпаведных артыкулах Крымінальнага кодэксу супраць вызначанага пераліку асобаў, якія прымаюць ўдзел у баявых дзеяннях на розных баках канфлікту ў Данбасе„, перадае словы Шуневіча Еўрарадыё.
Па словах міністра, гаворка ідзе пра дзясяткі асобаў. Праўда, не факт, што на кожнага з іх пачнуць крымінальную справу. Шуневіч кажа, што ўсё залежыць ад таго, наколькі поўна ўдасца сабраць матэрыялы і наколькі дастатковымі будуць падставы для крымінальных справаў.
