На беларускай мяжы – новыя правілы перамяшчэння тавараў
З 14 красавіка ў Беларусі ўведзеныя новыя правілы ўвозу тавараў для асабістага карыстання. Абмежаванне – гэта кошт тавара 300 еўра або вага 20 кілаграмаў. За перавышэнне нормаў давядзецца плаціць не толькі мытную пошліну, але і падатак на дададзеную вартасць. Але толькі ў тым выпадку, калі асоба перасякае мяжу часцей, чым раз на тры месяцы. Будуць улічвацца і тавары, набытыя ў крамах бяспошліннага гандлю. Праўда, існуе шэраг выключэнняў, якія агучыў у час прэс-канферэнцыі ў Менску намеснік старшыні Дзяржаўнага мытнага камітэту Уладзімір Арлоўскі:
– Выключэннем з’яўляюцца тавары, прывезеныя паветраным транспартам; таксама тавары, якія былі вывезеныя раней і ўвозяцца фізічнымі асобамі зваротна; тавары, якія ўвозяцца супрацоўнікамі дыпламатычных прадстаўніцтваў, консульскіх устаноў і іншых міжнародных арганізацый; атрыманыя ў спадчыну, і якія ўвозяцца пры перасяленні на сталае месца жыхарства ў Рэспубліку Беларусь.
Перад пачаткам дзеяння новых лімітаў на ўвоз тавараў у Беларусь, на мяжы ў польскім і літоўскім кірунках вялікага ажыятажу не назіралася. Хоць можна было адзначыць пэўнае павелічэнне руху аўтамабіляў, – распавёў нашаму радыё кіраўнік прэс-службы Дзяржаўнага памежнага камітэту Беларусі Аляксандр Цішчанка:
– У апошні тыдзень быў дастаткова актыўны рух асабліва на польскім кірунку. Бо, верагодна, з таго боку вязуць больш тэхнікі. Таму перыядычны ўсплёск узнікаў на Бераставіцы і Берасці. Там быў большы транспартны паток.
Адзначым, што з 14 красавіка ў Беларусі пачалі кругласутачна працаваць кол-цэнтры па новых правілах увозу тавараў для асабістага карыстання. Нумары тэлефонаў змешчаныя на афіцыйных сайтах Дзяржаўнага мытнага камітэта і мытняў.
Яна Запольская, Беларускае Радыё Рацыя
Глядзіце таксама
