На Берасцейшчыне з’явяцца новыя дзіцячыя садкі
Дванаццаць дзіцячых садкоў цягам пяці гадоў плануюць пабудаваць мясцовыя ўлады на Берасцейшчыне. Такія дадзеныя значацца ў плане мерапрыемстваў па забеспячэнні даступнасці дашкольнай адукацыі, які распрацаваў Берасцейскі абласны выканаўчы камітэт. Установы будуць разлічаныя амаль на 2,5 тысячы месцаў. Берасцейцы адзначаюць, што праблема ўладкавання дзяцей у садкі не страчвае сваю актуальнасць, а з кожным годам сітуацыя толькі ўскладняецца:
– Напрыклад, у Чэрнях зусім няма месцаў. Калі запісвалі дзіцяці, нам сказалі, што да школы не будзе месцаў. Зараз дачцэ 4 гады, то бок яшчэ 2 гады не будзе месцаў.
– У раёне новай забудовы, на той жа Вульцы, думаю, патрэбны яшчэ адзін садок. Дзеці – гэта заўсёды вострае пытанне. Ім патрэбны камфорт, месцы ў садках. І не павінна так быць: нараджаецца дзіця і бацькі адразу ж ідуць запісваць яго ў садок.
– На Бярозаўскім патрэбны садок. Там шмат дзяцей, і ўсім не хапае месцаў. Вялікія чэргі ў садкі. Бацькам даводзіцца вазіць дзяцей у іншыя раёны.
У 2016 годзе ў Берасцейскай вобласці плануецца пабудаваць тры дашкольныя ўстановы на 350 месцаў, а да 2018 года павінны з’явіцца першыя дзіцячыя садкі ў дабудаваных да жылых дамоў памяшканнях.
Беларускае Радыё Рацыя, Берасце
Фота minibanda.ru
Глядзіце таксама
