Над былым дэпутатам адбыўся суд без яго ўдзелу
У Пінску былы дэпутат гарадскога Савета Аляксандр Аўсяенка даведаўся, што яго судзілі за ўдзел у пратэстных акцыях, калі да яго ўжо прыйшлі судовыя выканаўцы. Высветлілася, што працэс без яго ведама адбыўся яшчэ некалькі месяцаў таму і Аўсяенка пакаралі штрафам 540 рублёў.
Па словах праваабаронцы Алеся Рамановіча, суд без удзелу абвінавачанага адбываецца тады, калі ёсць доказы, што асобу праінфармавалі пра працэс, але гэтага не было:
– Не паведамілі, што ў яго будзе суд. Суд прайшоў без яго. Яму трэба было адразу пісаць касацыйную скаргу і абскарджваць рашэнне суда, таму што не мог суд без яго прайсці. Ён адсутнічаў па важкай прычыне. Калі б яны даказалі, што яму паведамілі, але ён не прыехаў на суд, то ўсё б было так. Такое практыкуецца ў нас у Беларусі.
Праваабаронца дадае, што сітуацыя з Аляксандрам Аўсяенка не адзінкавая. Сёлета дзясяткі пінчукоў даведаліся пра прысуды за ўдзел у акцыях менавіта ў момант візітаў судовых выканаўцаў.
Беларускае Радыё Рацыя
Глядзіце таксама
