Надалей не адпавядае міжнародным стандартам
Закон надалей не адпавядае міжнародным стандартам. Нязначна яго палепшылі, але гэта не рэалізуе права грамадзянаў на свабоду сходаў. Так праваабаронцы каментуюць новыя папраўкі ў закон аб масавых мерапрыемствах, якія 26 студзеня ўвайшлі ў сілу. Абноўлены закон аб масавых мерапрыемствах уводзіць паведамляльны прынцып на правядзенне масавых мерапрыемстваў, але толькі ў тым выпадку, калі яны запланаваныя ў спецыяльна адведзеных для гэтага месцах. Праваабаронцы рыхтавалі свае прапановы, але беларускія заканадаўцы іх не ўлічылі, заўважае каардынатар юрыдычных праграм Беларускага Хельсінкскага камітэта Дзмітрый Чарных.
– Закон не адкідае сітуацыю назад. Гэта невялікае паляпшэнне. Паглядзім, канешне, як гэта будзе працаваць на практыцы. Мы ў цэлым, і Беларускі Хельсінкскі камітэт, і праваабарончыя арганізацыі, выступаем за тое, каб быў прыняты новы закон у новай рэдакцыі з захаваннем усіх прынцыпаў датычна свабоды мірных сходаў, якія ўжо ёсць у свеце і перадавой практыцы, у тым ліку.
Праваабаронцы лічаць, што беларускі закон аб масавых мерапрыемствах настолькі не адпавядае міжнародным нормам і прынцыпам, што неабходна не ўносіць у яго папраўкі, а распрацаваць і прыняць новы закон з улікам палажэнняў і патрабаванняў Міжнароднага пакта аб грамадзянскіх і палітычных правах.
Улад Грынеўскі, Беларускае Радыё Рацыя
Фота belta.by
Глядзіце таксама
