Невядомыя апаганілі помнік Міхаілу Жызнеўскаму
Невядомыя апаганілі помнік герою Нябеснай сотні Міхаілу Жызнеўскаму, устаноўлены на яго магіле на могілках каля вёскі Сцяг Працы Гомельскага раёна.
Як паведаміла маці загінулага Ніна Жызнеўская, невядомыя надрапалі на помніку слова „здраднік”. „Мы паведамілі пра гэта ва ўкраінскае пасольства, напісалі заяву ў міліцыю, хаця і не верым, што міліцыя знойдзе вінаватых. Ужо неаднаразова вандалы спрабавалі знішчыць памяць пра Мішу — рвалі на яго магіле ўкраінскія стужачкі, перакульвалі вянкі і кошыкі, раскідвалі ўсе”, — адзначыла Ніна Жызнеўская.
Помнік быў выраблены за сродкі неабыякавых людзей з розных краін, яго стварыў вядомы скульптар Аляксандр Шатэрнік. Помнік з граніту нагадвае адкрытую кнігу, якая сімвалізуе кнігу жыцця Міхаіла Жызнеўскага. Ён быў адкрыты 7 ліпеня 2015 года.
Беларус, ураджэнец Гомеля Міхаіл Жызнеўскі загінуў на Майдане ў Кіеве 22 студзеня 2014 года.
Фота Белсат
Глядзіце таксама
