Незадаволеная скарга аб’яднання „ЭкаБрэст” на адмову ў рэгістрацыі
Судовая калегія па грамадзянскіх справах Берасцейскага абласнога суда пакінула без задавальнення скаргу абласнога экалагічнага праваабарончага грамадскага аб’яднання «ЭкаБрэст» на адмову ў рэгістрацыі, паведаміў БелаПАН старшыня абʼяднання, праваабаронца Раман Кісляк.
Устаноўчы сход арганізацыі адбыўся 26 мая. Заснавальнікамі абʼяднання выступілі 12 жыхароў Берасця і Берасцейскага раёна. Галоўная мэта арганізацыі – шырокае прыцягненне грамадскасці да вырашэння экалагічных праблем, абарона правоў і свабоды чалавека, зафіксаваных у Канстытуцыі Беларусі і яе міжнародных дагаворах.
26 чэрвеня ў галоўнае ўпраўленне юстыцыі Берасцейскага аблвыканкама былі пададзены дакументы на рэгістрацыю арганізацыі. 26 ліпеня была атрымана адмова ў дзяржрэгістрацыі.
У абгрунтаванні адмовы галоўнае ўпраўленне юстыцыі ўказала, што дакументы, прадстаўленыя для дзяржаўнай рэгістрацыі, змяшчаюць парушэннi заканадаўства, выяўленыя парушэнні носяць неадольны характар, а дакументы, прадстаўленыя для дзяржаўнай рэгістрацыі ГА «ЭкаБрэст», не адпавядаюць «патрабаванням заканадаўства Рэспублікі Беларусь».
«Кіраўніцтву юстыцыі аблвыканкама не спадабалася стылістыка пададзеных намі дакументаў. Мы лічым, што гэтага недастаткова для адмовы ў рэгістрацыі, і даказвалі гэта ў судзе. Суд пагадзіўся з часткай нашых довадаў, але пры гэтым стаў на бок аблвыканкама і ў сваім рашэнні паказаў, што адмова ў рэгістрацыі правамерная. Мы маем намер падаваць апеляцыйную скаргу ў Вярхоўны суд», – заявіў Кісляк.
Арганізацыя «ЭкаБрэст» зʼявілася ў выніку працяглага грамадскага выступлення супраць будаўніцтва акумулятарнага завода пад Берасцем, у ходзе якога адстойваліся не толькі экалагічныя, але і грамадзянскія правы. Заснавальнікі абʼяднання лічаць, што «ЭкаБрэст» дапаможа вырашыць гэтую праблему.
Акумулятарны завод ТАА «АйПаўэр» пабудаваны на прамысловай пляцоўцы «Аэрапорт» у СЭЗ «Брэст». На заводзе плануецца наладзіць поўны цыкл вытворчасці свінцова-кіслотных акумулятарных батарэй. Жыхары Берасця і Берасцейскага раёна лічаць, што прадпрыемства пагражае іх здароўю. Актывісты выявілі шэраг парушэнняў пры рэалізацыі праекта.
Грамадская кампанія супраць акумулятарнага завода пачалася ў рэгіёне ў студзені 2018 года. За гэты час актывісты падалі заяўкі на правядзенне ў Берасце і Берасцейскім раёне 237 мітынгаў, 12 пікетаў і 16 дэманстрацый. Улады санкцыянавалі толькі адну акцыю: 29 красавіка 2018 года мітынг «Брэстаўчанкі супраць свінцу», на які прыйшлі каля дзвюх тысяч чалавек.
Праціўнікі завода збіраюцца з 25 лютага 2018 года кожную нядзелю на плошчы Леніна ў Берасці.
Глядзіце таксама
