Незалежны журналіст аштрафаваны ў Шаркоўшчынскім судзе
23 базавыя велічыні штрафу (563.5 беларускіх рублёў) прысудзіла суддзя Шаркоўшчынскага суда Аксана Табола незалежнаму журналісту Змітру Лупачу. Журналісту зноў інкрымінавалі парушэнне Закона аб СМІ і прыцягнулі да адказнасці па частцы 2 артыкула 22.9 КаАП.
Паводле Змітра Лупача, гэта самы маленькі штраф, якім яго каралі за ўсе сем апошніх судоў. «Напэўна, таму, што Шаркоўшчынскі раён самы бедны, таму і штраф такі невялікі», — дадае журналіст.
— І відаць, што гэта быў указ зверху, бо яны спяшаліся. Заўтра заканчваецца тэрмін па гэтай адміністрацыйнай справе, таму яны хацелі паспець. Я вельмі ўражаны і ўдзячны, што прыйшлі людзі, гэта першы раз за ўсе гэтыя справы, калі было столькі людзей. Я думаў, можа гэта таксама сыграла крыху на тое, што штраф не такі вялікі.
На гэты раз падтрымаць Змітра Лупача ў судзе прыйшлі не толькі яго калегі і сябры, але і простыя жыхары Шаркоўшчыны.
Сёлета гэта ўжо трэці па ліку суд у незалежнага журналіста за супрацу з тэлеканалам “Белсат”. Раней яго судзілі ў Пастаўскім і Докшыцкім судах, дзе аштрафавалі на 25 і 40 базавых велічынь адпаведна.
Таццяна Смоткіна, Беларускае Радыё Рацыя
Глядзіце таксама
