Незалежным журналістам адмовілі ў акрэдытацыі на суд па справе „Белгазпрамбанка”
На пасяджэнне па крымінальнай справе ў дачыненні да топ-менеджараў „Белгазпрамбанка”, якое пачнецца 17 лютага, слухачоў будуць пускаць з улікам умяшчальнасці залы і нормаў сацыяльнага дыстанцыявання, гаворыцца ў тлумачэнні прэс-службы Вярхоўнага суда ў адказ на „шматлікія электронныя звароты грамадзян”.
16 лютага стала вядома, што журналістам шэрагу недзяржаўных выданняў адмовілі ў акрэдытацыі на судовае пасяджэнне, сярод іх інфармагенцтва БелаПАН, інтэрнэт-газета Naviny.by, партал tut.by, газета „Белорусы и рынок”.
У сваім паведамленні ВС канстатаваў, што магчымасць прысутнічаць у адкрытым судовым пасяджэнні асобам, якія не з’яўляюцца ўдзельнікамі працэсу, і журналістам — гэта рэалізацыя прынцыпу галоснасці правасуддзя, і неабгрунтаванае абмежаванне доступу грамадзян у залу суда не дапускаецца. Пры гэтым падкрэсліваецца, што „ў мэтах забеспячэння належнага парадку ў судовым пасяджэнні, бяспекі ўдзельнікаў працэсу і прысутных пытанне допуску ўсіх ахвотных грамадзян у адкрытае судовае пасяджэнне дазваляецца судом з улікам умяшчальнасці залы судовага пасяджэння”.
У прэс-службе таксама адзначылі, што з-за эпідэміялагічнай сітуацыі будуць прынятыя меры па „забеспячэнні сацыяльнага дыстанцыявання пры размяшчэнні людзей у зале”.
„Для забеспячэння грамадскага парадку органы ўнутраных спраў прымуць неабходныя меры бяспекі”, — адзначаецца ў паведамленні.
У выпадку немагчымасці забяспечыць допуск у залу ўсіх ахвотных інфармаванне грамадскасці можа ажыццяўляцца праз інфармацыйныя бюлетэні, прэс-рэлізы, СМІ і іншымі спосабамі, падкрэслілі ў судзе.
4 лютага прайшло папярэдняе пасяджэнне па справе „Белгазпрамбанка”. Яго прызначылі ў сувязі з тым, што з шасцю абвінавачанымі па справе заключаныя дасудовыя пагадненні аб супрацоўніцтве. Прадстаўнікам беларускіх недзяржаўных СМІ тады таксама адмовілі ў допуску ў залу судовага пасяджэння.
11 чэрвеня 2020 года ў галаўным офісе „Белгазпрамбанка” прайшоў вобшук у межах крымінальнай справы аб ухіленні ад выплаты падаткаў і легалізацыі сродкаў, атрыманых незаконным шляхам. Большасць членаў праўлення „Белгазпрамбанка” былі затрыманыя.
18 чэрвеня быў затрыманы былы старшыня праўлення „Белгазпрамбанка” Віктар Бабарыка, які пакінуў банк у маі 2020 года ў сувязі з удзелам у прэзідэнцкіх выбарах. Яго абвінавачваюць у арганізацыі супрацьпраўнай дзейнасці ў гады, калі ён кіраваў банкам. Пры гэтым прадстаўнікі ўлады сцвярджаюць, што ў крымінальным пераследзе Бабарыкі няма палітычнай падаплёкі. Сам ён перакананы ў адваротным.
Бабарыку выстаўленае абвінавачанне ў здзяйсненні злачынстваў, прадугледжаных ч. 3 арт. 430 і ч. 2 арт. 235 КК, па фактах атрымання хабару арганізаванай групай у асабліва буйным памеры, а таксама легалізацыі („адмывання”) сродкаў, атрыманых злачынным шляхам, у асабліва буйным памеры.
Намеснікам старшыні праўлення банка Сяргею Шабану, Аляксандру Ільясюку, Кірылу Бадзею, Дзмітрыю Кузьмічу, а таксама былым першаму намесніку старшыні праўлення Аляксею Задойку і намесніку старшыні праўлення Сяргею Дабралёту выстаўленае абвінавачанне ў здзяйсненні злачынства, прадугледжанага ч. 3 арт. 430 КК. Заснавальніку ТАА „Актыўлізінг” Віктару Кабяку выстаўленае абвінавачанне ў здзяйсненні злачынства згодна з ч. 2 арт. 431 КК (даванне хабару ў буйным памеры).
Глядзіце таксама
