Новыя авіярэйсы ў гарады Украіны
З-за нядаўняга спынення авіястасункаў паміж Украінай і Расеяй ва ўкраінцаў сталі больш запатрабаванымі паслугі беларускай нацыянальнай кампаніі «Белавія». У мінулую нядзелю быў адкрыты рэйс «Менск-Адэса», у планах – павелічэнне рэйсаў у Кіеў, кажа генеральны дырэктар нацыянальнай авіякампаніі «Белавія» Анатоль Гусараў.
– Мы сёння лятаем у Кіеў два разы ў дзень. Мяркую, што ў бліжэйшыя дні мы будзем вырашаць пытанне пра адкрыццё трэцяй частаты ў Кіеў. У нядзелю адкрылі рэйс на Адэсу. Мы планавалі гэты рэйс адкрыць летам наступнага году, але сітуацыя склалася такім чынам, што мы гэта зрабілі цяпер.
Дырэктар дэпартамента па авіяцыі Міністэрства транспарту і камунікацый Уладзімір Косьцін кажа пра вялікую верагоднасць адкрыцця рэйсаў у іншыя гарады Украіны.
– Да нас паступіў афіцыйны зварот уладаў Украіны аб адкрыцці рэйса Запарожжа-Менск-Запарожжа. Мы гэтыя дакументы разглядаем. Бліжэйшым часам намі будзе прынятае рашэнне пра адкрыццё гэтага рэйса. Таксама можна разглядаць адкрыццё рэйса на Харкаў і гаварыць пра накірунак на Львоў.
Акрамя таго, паведаміў Анатоль Гусараў, летам наступнага году плануецца адкрыць чартэрны рэйс з Менску на Канарскія выспы.
Беларускае Радыё Рацыя
Глядзіце таксама
