Па факце „мініравання” абкамаў БРСМ пачата крымінальная справа (абноўлена)
Па факце ілжывага паведамлення аб мініраванні памяшканняў абласных і сталічнага камітэтаў БРСМ Ленінскі (г. Менска) раённы аддзел Следчага камітэта пачаў справу на падставе ч. 1 арт. 340 Крымінальнага кодэкса.
Згодна са звесткамі следства, на электронныя паштовыя скрыні камітэтаў 15 ліпеня паступілі паведамленні аб мініраванні. „У самыя кароткія тэрміны праваахоўнымі органамі прынятыя меры па арганізацыі бяспекі грамадзян. На месцы здарэнняў выбывалі следча-аператыўныя і сапёрна-тэхнічныя групы. Ні на адным з аб’ектаў выбуховых прыладаў не выяўлена”, — адзначаецца ў рэлізе аддзела інфармацыі і сувязі з грамадскасцю СК.
У рамках пачатай крымінальнай справы ў Менску і абласных цэнтрах „праводзяцца агляды камп’ютарнай тэхнікі, дапытваюцца сведкі, усталёўваецца асоба падазронага”.
Следчы камітэт звяртае ўвагу грамадзян на тое, што яўна ілжывае паведамленне аб небяспецы — выбуху, падпале і іншых дзеяннях, якія ствараюць небяспеку для жыцця і здароўя людзей, — цягне крымінальную адказнасць, што наступае з 14 гадоў. Максімальнае пакаранне згодна з артыкулам 340 КК — сем гадоў пазбаўлення волі. Акрамя таго, заканадаўства прадугледжвае кампенсацыю вінаватым усіх выдаткаў, якія панеслі экстранныя службы пры рэагаванні на ілжывае паведамленне.
Глядзіце таксама
