Збіраюцца подпісы за ўсталяванне шыльды ў гонар 100-годдзя БНР
Рух „За Свабоду” збірае подпісы для ўсталяванне шыльды на будынку па вуліцы Валадарскага ў Менску, у якім у сакавіку 1918 года была абвешчана Беларуская Народная Рэспубліка.
Раней Менгарвыканкам адмовіўся выконваць сваё абяцанне ўсталяваць гэтую мемарыяльную дошку, якое было дадзена амаль паўгода таму – напярэдадні стагоддзя абвяшчэння БНР. Зараз чыноўнікі спасылаюцца на нейкія адмоўныя звароты грамадзянаў. Па меркаванні старшыні Руху „За свабоду” Юрася Губарэвіча, – гэта пустыя адгаворкі. „Адзіныя незадававоленыя грамадзяне, на якіх можа адрэагаваць Менгарвыканкам, – гэта чыноўнікі Адміністрацыі прэзідэнта, якія, магчыма, спалохаліся сваіх жа ранейшых абяцанняў усталяваць гэтую шыльду,” – лічыць Губарэвіч.
– Магчыма нехта з іх начальства перагледзеў сваё рашэнне. Тут можна толькі гадаць. Я глыбока перакананы, наўрад хтосьці ў самой Беларусі сярод звычайных грамадзян мае такое негатыўнае стаўленне да адзначэння гэтай даты. Дата была адсвяткавана з размахам. І мы гэта бачылі па тых мерапрыемствах, якія праходзілі ў сакавіку, і па сённяшні дзень шмат падзеяў прысвечана стагоддзю БНР.
Odtwarzacz plików dźwiękowych
Юрась Губарэвіч спадзяецца, што сітуацыю можа выправіць публічны грамадскі ціск на чыноўнікаў Менгарвыканкаму. Дзеля гэтага Рух „За свабоду” арганізаваў на адной з публічных інтэрнет-пляцовак падпісанне петыцыі за ўсталяванне мемарыяльай шыльды ў гонар БНР. Калі такіх подпісаў і зваротаў будзе тысячы і дзясяткі тысячаў, то Менгарвыканкаму давядзецца ўзяць назад свае словы пра тоё, што нейкія грамадзяне выступаюць супраць, – лічыць Юрась Губарэвіч.
Генадзь Барбарыч, Беларускае Радыё Рацыя, Менск
