Падняў з зямлі міліцэйскі дручок – два гады турмы
У судзе Кастрычніцкага раёну Віцебску агучылі прысуд 27-гадоваму майстру, разьбяру па дрэве Уладзіславу Макавецкаму. Суддзя Сняжана Кіндзеева прызнала яго вінаватым паводле артыкула 364 Крымінальнага кодэкса («Гвалт або пагроза ўжывання гвалту ў дачыненні супрацоўніка ўнутраных спраў»). Вырак – два гады пазбаўлення волі ў калоніі ва ўмовах агульнага рэжыму.
Паводле матэрыялаў следства, падчас пратэставага шэсця Макавецкі нібыта меў намер нанесці нагамі і рукамі ўдары старшаму сяржанту МУС Фядотаву і замахваўся падабраным дручком на малодшага сяржанта Пятроўскага. Фактаў гвалту ў судзе засведчана не было, аднак пракурор Філіпенка заявіў, што «міліцыянты не атрымалі пашкоджанняў цела толькі дзякуючы сваім прафесійным якасцям».
Праваабаронца Павел Левінаў лічыць абвінавачанне несправядлівым:
– Чалавек нічога не зрабіў, а толькі выйшаў на мірнае шэсце і, як напісана ў матэрыялах справы, нібыта замахнуўся ў бок супрацоўнікаў органаў унутраных справаў. За гэта атрымаць два гады пазбаўлення волі можна, напэўна, толькі ў Беларусі і ў Паўночнай Карэі.
Усе, хто асабіста ведае Уладзіслава Макавецкага, шакаваныя абвінавачаннем і выракам. Бо хлопца ведаюць як выхаванага, разважлівага чалавека.Такім яго характарызуе і маці, спадарыня Наталля:
– Ён вельмі спакойны, разважлівы. Майму сыну 27 гадоў, і ён ніколі ні з кім не пабіўся. Улад заўсёды быў чэсны, і на судзе казаў праўду – было відаць, што ён шчыры. Ён нават папрасіў прабачэння ў міліцыянтаў за тое, што гэтая сітуацыя іх спалохала. Але сказаў: “Я нікому не хацеў зрабіць балюча, і я гэтага не зрабіў”.
Уладзіслаў Макавецкі таленавіты разьбяр па дрэве, адзін з суаўтараў 23-метровай драўлянай лыжкі, якая экспануецца ў Беразіне. Таксама ён мастак-рэстаўратар, мае вялікую калекцыю артэфактаў часу Другой Сусветнай вайны. Падчас ператрусу міліцыянты яе сфатаграфавалі і назвалі хлопца прапагандатарам нацысцкай сімволікі.
Беларускае Радыё Рацыя, Віцебск
