Паліне Шарэндзе-Панасюк абвешчана папярэджанне ад камісіі па справах непаўнагадовых (абноўлена)
У адміністрацыі Маскоўскага раёна Берасця завяршылася паседжанне камісіі па справах непаўнагадовых, куды запрасілі мясцовую актывістку і маці — Паліну Шарэнду-Панасюк. У ейны склад увайшоў шэраг прадстаўнікоў дзяржаўных установаў і органаў.
Само рашэнне агучыла намесніца старшыні згаданай камісіі Валянціна Зданевіч, паводле інфармацыі, якая паступіла ад РАУС Ленінскага раёна Берасця:
– Інфармацыя, якая паступіла ў камісію, гаворыць пра тое, што вы былі на несанкцыянаваным масавым мерапрыемстве і з вамі было непаўнагадовае дзіця. Знаходжанне дзяцей на такіх мерапрыемствах нясе непасрэдную пагрозу іх жыццю і здароўю. Калі ў нас праходзяць масавыя санкцыянаваныя мерапрыемствы, вядзецца ахова грамадскага парадку, знаходзяцца карэты хуткай дапамогі. Калі гэта несанкцыянаванае масавае мерапрыемства, не забяспечваецца ахова грамадскага парадку. Мы разглядаем гэтую інфармацыю і папярэджваем вас пра тое, што дзеці мусяць знаходзіцца ў бяспечных умовах. Таму мы вас папярэджваем.
Паліна Шарэнда-Панасюк расцэньвае гэтую сітуацыю як «палітычна матываваны ціск», як і мясцовая праваабарончая супольнасць.
Актывістка так пракаментавала рашэнне камісіі для тых, хто прыйшоў яе падтрымаць:
– Вы пабывалі на гэтым цырку на дроце, вы пабачылі блазанаў. Вы пабачылі іх пазіцыю, як яны трактуюць народ. Сапраўды, хутка нельга будзе з дзіцём выйсці ў кавярню, краму, на вуліцу, бо побач можа быць мітынг. Любы збор людзей – несанкцыянаваны. Таму пасыл такі – сядзіце з дзецьмі дома, нікуды не лезце.
Гэта не першы падобны выпадак у Беларусі, звязаны з бацькамі — удзельнікамі акцыяў пратэсту супраць вынікаў прэзідэнцкіх выбараў і гвалту сілавікоў.
***
Берасцейцы выказалі салідарнасць з актывісткай і маці Палінай Шарэндай-Панасюк. Каля 40 чалавек прыйшлі падрымаць яе на паседжанні камісіі па справах непаўнагадовых:
– Акцыі салідарнасці ці ўвогуле ў нядзелю выходзілі прагуляцца па сваім горадзе, і хто-небудзь даведаўся пра гэты момант, і даносяць пасля ў школу ці ў іншыя ўстановы адукацыі, што бацькі прымалі ўдзел у мірных публічных акцыях. І праз установы адукацыі даносяць да адказных структураў, якія займаюцца апекай, і выклікаюць бацькоў на такія камісіі.
– Зараз яны не выбіраюць сродкі. Не важна – праз дзяцей, праз бацькоў, абы напалохаць. Нават такая невялікая колькасць людзей усё роўна раздражняе, бо яны выглядваюць з вокнаў і страх у іх у вачах, а не ў нас.
Пасля завяршэння паседжання камісіі Паліна Шарэнда-Панасюк падзякавала прысутных за падтрымку.
Беларускае Радыё Рацыя, Берасце
