Палітвязню Аляксандру Раентаву прысудзілі пяць год калоніі
За тое, што схапіў сілавіка за плячо.
У судзе Фрунзенскага раёна Менска быў абвешчаны прысуд па справе Аляксандра Раентава. Яго абвінавачвалі паводле ч.1 арт. 342 КК і ч.2 арт. 363, піша spring96.org.
Справу разглядаў суддзя Андрэй Млечка. Бок абвінавачання падтрымліваў пракурор Таратынка. Пацярпелыя — Хоміч, Дзмітрый Агіевіч, Андрэй Свядыш.
Пракурор Таратынка заявіў, што віна Аляксандра Раентава цалкам даказаная па ўсіх складах прадстаўленага абвінавачвання.
Было даказана, што Раентаў быў адміністратарам чата «Палігон». З паказанняў пацярпелага Хоміча вынікае, што Раентаў удзельнічаў у несанкцыянаваным масавым мерапрыемстве 29 жніўня, а таксама кіраваў натоўпам, паказваючы напрамак руху.
15 лістапада ён сустрэўся з групай грамадзян і прайшоў з імі па маршруце і затым выйшаў на праезную частку на вуліцы Някрасава. На дыску з аператыўнага назірання відаць, што група цалкам займала праезную частку, чым перашкаджала руху грамадскага транспарту.
З аналізу паведамленняў чата «Палігон» зафіксавана распаўсюджванне дэструктыўнай інфармацыі.
Паказанні сведак, што Раентаў не заклікаў іх да ўдзелу ў несанкцыянаваных масавых мерапрыемствах, не могуць быць прынятыя судом, бо асобы некампетэнтныя і аказваюць садзейнічанне Раентаву. А адзін з іх прыцягваецца да адміністрацыйнай адказнасці за ўдзел у несанкцыянаваным масавым мерапрыемстве.
«З чэрвеня па снежань арганізоўваў групавыя дзеянні, якія груба парушаюць грамадскі парадак, што відаць з таго, што ён арганізоўваў збор удзельнікаў шляхам размяшчэння паведамленняў у чаце, кіраваў іх дзеяннямі, меў зносіны з удзельнікамі несанкцыянаваных мерапрыемстваў», кажа пракурор.
Актыўна супраціўляўся з ужываннем гвалту: хапаў пацярпелага Агіевіча 29 жніўня ў тралейбусе за перадплечча, што відаць на відэазапісе.
Пракурор прасіў пакараць Раентава па ч.1 арт 342 КК — пазбаўленнем волі на тры гады, па ч.2 арт. 363 — таксама пазбаўленнем волі на тры гады.
Шляхам частковага складання пакаранняў суддзя прызначыў 5 гадоў у калоніі агульнага рэжыму.
Таксама спагнаць на карысць пацярпелага Сведыша 1000 рублёў маральнай кампенсацыі.
