Пасля 20-гадовых спрэчак Латвія адкрыла архівы КДБ
20 снежня Нацыянальны архіў Латвіі адкрыў доступ да часткі картатэкі КДБ – так званых «мяшкоў ЧК». З карткамі агентаў можна азнаёміцца на сайце архіва, піша delfi.lv.
Архіў ў выглядзе файлаў у фармаце PDF выкладзены па адрасе kgb.arhivi.lv. Таксама можна зайсці на асноўны сайт архіва – www.arhivi.gov.lv, затым выбраць раздзелы Aktualitātes або Virtuālās izstādes un digitālie resursi. Дакументы апублікаваныя ў адсканаваным выглядзе, то бок асноўная частка картатэк будзе на рускай мове, а тэкст – напісаны ад рукі.
Картатэка агентуры КДБ у Латвійскай СССР (усяго 10 612 картак) апублікаваная ў алфавітным парадку. У яе ўваходзяць імёны і актыўных у канцы 1980-х гадоў агентаў, і выключаных. Таксама 1-ы аддзел КДБ (выведка) уносіў у гэты архіў агульныя дадзеныя аб асобах, якія планавалі выехаць з СССР за мяжу, а таксама імёны патэнцыйных кандыдатаў для вярбоўкі ў выпадку вайны ці неспадзяванай сітуацыі.
Спрэчкі вакол адкрыцця архіваў КДБ у Латвіі ішлі на працягу дзесяцігоддзяў. Мяркуецца, што ў пачатку 1990-х гадоў самая каштоўная частка архіва магла быць вывезена ў Маскву.
