У Менску будуць судзіць Паўла Севярынца (абноўлена)
2 траўня Паўла Севярынца прывезлі ў суд Цэнтральнага раёна Менска.
Яго затрымалі пасля акцыі 1 мая. Ноч ён правёў у ізалятары на Акрэсціна. Севярынец кажа, што яго затрымалі ў метро пасля акцыі, калі ён вяртаўся дадому. На станцыі «Пушкінская» да яго падышлі двое амапаўцы. На выхадзе пад’eхала машына і павезлі.
У суд таксама даставілі Максіма Вінярскага, якога таксама затрымалі пасля акцыі.
* * *
Стала вядома, дзе зараз знаходзіцца сустаршыня Беларускай хрысціянскай дэмакратыі Павел Севярынец.
Як паведаміла ў „Фэйсбуку” яго жонка Вольга, апазіцыйны палітык змешчаны ў Цэнтр ізаляцыі правапарушальнікаў ГУУС Менгарвыканкама. За што – невядома. Справа будзе слухацца 2 траўня ў судзе Цэнтральнага раёна.
Нагадаем, раней БХД заявіла, што Севярынец зьнік пасьля першамайскай акцыі апазіцыі ў цэнтры Менска.
Збіраючыся на акцыю, Павел забыўся дома тэлефон, таму звязацца з ім было немагчыма.
Марына Адамовіч, жонка аднаго з лідараў Беларускага нацыянальнага кангрэса Мікалая Статкевіча распавяла, што развіталася з Севярынцам каля станцыі метро „Кастрычніцкая”. Зараз яго месцазнаходжанне невядома.
* * *
Пасля першамайскай акцыі на Кастрычніцкай плошчы і шэсця да Плошчы Незалежнасьці знік сустаршыня Беларускай хрысьціянскай дэмакратыі Павел Севярынец.
Пра гэта паведаміў сустаршыня БХД Дзяніс Садоўскі:
«Перад тым, як пайсці на акцыю, ён пакінуў тэлефон дома, таму сувязь з ім фізічна немагчымая. Усе мы бачылі, што ён гэтую акцыю годна правёў. Апошні раз яго бачылі, калі ён развітаўся з усімі і пайшоў у бок станцыі метро Кастрычніцкая. Ён планаваў ехаць дадому. Прайшло ўжо больш за 2 гадзіны. Дома ён не з’яўляўся, адпаведна ніякай інфармацыі ад яго не паступала. Таму ёсць вялікая верагоднасць, што ён затрыманы».
