Паўла Севярынца пасадзілі на 15 сутак
Арганізатара пратэстаў супраць інтэграцыі з Расеяй Паўла Севярынца 26 снежня аштрафавалі на 1275 рублёў за заклік да акцыі пратэсту. Пасля суду яго адвезлі ў турму на завулку Акрэсціна адбываць раней прысуджаныя 15 сутак арышту.
***
Палітык Павел Севярынец, які з’яўляецца арганізатарам снежаньскіх акцый супраць інтэграцыі з Расеяй, 26 снежня зноў затрыманы. Каля пад’езда яго чакалі АМАПаўцы. Калі Севярынец выйшоў на вуліцу – яго затрымалі. Вядома, што павезлі яго ў РУУС Цэнтральнага раёна.
Літаральна тыдзень таму, 18 снежня, Севярынца затрымалі такім жа чынам. Яго прывезлі ў РУУС, там склалі пратакол за ўдзел у акцыях 7 і 8 снежня, і адразу павезлі на суд, дзе прысудзілі 15 сутак арышту. Аднак пасля агучвання рашэння палітыка адпусцілі, папярэдзіўшы ад недапушчальнасці парушэння заканадаўства на масавых акцыях. У выніку Павел Севярынец змог прыняць удзел у новай акцыі за незалежнасць 20 снежня. Такім чынам, затрымаць на 15 сутак яго могуць у любы момант.
Сёння, 26 снежня, у судзе Фрунзенскага раёна (у 11.00) палітыка мусілі судзіць за заклік да ўдзелу ў першай акцыі супраць інтэграцыі, што прайшла 7 снежня. Ці адбыўся суд без яго – пакуль невядома.
Палітык заклікаў выйсці на новую акцыю пратэсту супраць інтэграцыі 29 снежня.
