Перакрыты канал незаконнай міграцыі афганцаў праз Беларусь
Аператыўныя падраздзяленні Дзяржаўнага пагранічнага камітэта і Міністэрства ўнутраных спраў Беларусі перакрылі міжнародны канал па арганізацыі незаконнай міграцыі грамадзян Афганістана цераз Беларусь у Літву і краіны Заходняй Еўропы, які дзейнічаў з ліпеня 2017 г.
Як паведамілі БелаПАН у Дзяржпагранкамітэце, ноччу 25 жніўня ў Пастаўскім раёне паблізу мяжы аператыўнікі затрымалі чатыры аўтамабілі, у якіх знаходзіліся 11 афганцаў, а таксама арганізатары і памагатыя супрацьпраўнай дзейнасці: трое грамадзян Беларусі і двое — Таджыкістана.
Яны завезеныя ў Смаргонскую пагранічную групу для разбору. У дачыненні да арганізатараў і саўдзельнікаў незаконнай міграцыі органам дазнання аператыўнага падраздзялення памежнай службы пачатая справа на падставе ч. 2 арт. 371-1 КК (арганізацыя незаконнай міграцыі, учыненая групай асоб паводле папярэдняй змовы), якая прадугледжвае да сямі гадоў пазбаўлення волі з канфіскацыяй маёмасці або без канфіскацыі.
