«Першамаю трэба вярнуць першапачатковае значэнне»
Свята працоўнай салідарнасці Першамай з’яўляецца ў Беларусі выходным днём, як гэта было і за савецкім часам, калі прымусовымі дэманстрацыямі ўлады дэманстравалі ўсяму свету шчаслівых і ўдзячных уладзе грамадзян. Цяпер, калі нешта ўладамі арганізоўваецца, то, звычайна, сціпла і не масава. — Беларусы не ўспрымаюць свята Першамая як дзень барацьбы за свае працоўныя правы. Першамаем нашы людзі карыстаюцца як дадатковым выходным для вырашэння сваіх асабістых спраў, — кажа старшыня Цэнтральнай рады Беларускай сацыял-дэмакратычнай партыі (Грамада) Анатоль Сідарэвіч:
— Яму трэба вярнуць першапачатковае значэнне: Дзень барацьбы наёмных работнікаў за свае правы. За годны заробак, за добрыя ўмовы працы, за добрае сацыяльнае забеспячэнне. Вось за гэта павінны змагацца, а не галёкаць: «Ура партыі!». За савецкім часам было: «партыі Леніна Ура», а цяпер афіцыйна наладжваюць гэтыя «ля-ля-ля». Трэба змагацца за правы працоўных.
У Беларусі свята працы было заснавана ўказам кіраўніка дзяржавы ў сакавіку 1998 года. Дзень міжнароднай салідарнасці працоўных адзначаюць больш як у 140 краінах. У яго аснове ляжаць падзеі 1 мая 1886 года, калі актывісты рабочага руху ЗША і Канады правялі серыю мітынгаў і дэманстрацый, патрабуючы ўвядзення васьмігадзіннага працоўнага дня.
Поўны матэрыял слухайце ў далучаным аўдыёфайле:
Беларускае Радыё Рацыя
Глядзіце таксама
