Пікет адчаю перад будынкам адміністрацыі прэзідэнта
Валянціна Каваленка з Бабруйску правяла каля адміністрацыі прэзідэнта ў Менску па вуліцы Карла Маркса адзіночны пікет.
Яна выйшла да будынку з самаробным плакатам „Пры падтрымцы адміністрацыі прэзідэнта — у краіне міліцэйскі праізвол”. Такім чынам яна спрабуе звярнуць увагу на парушэнні правоў яе сына, які адбывае пакаранне ў калоніі №22. На пікет жанчыну падштурхнула тое, што ёй было адмоўлена ў сустрэчы з першым намеснікам кіраўніка адміністрацыі Максімам Рыжанковым, які раней абяцаў разабрацца ў справе. Але ў выніку скаргі былі накіраваны ў Міністэрства ўнутраных спраў, адкуль прыйшлі фальсіфікаваныя, па словах Каваленкі, адпіскі.
– Мой сын з 2015 года ўжо мае права на змену рэжыма. Ён з 2011 года знаходзіцца на палепшаных умовах утрымання. Усе крытэрыі, усталяваныя законам, ён выканаў. Закон дазваляе яму змену рэжыма, або ўмоўна датэрміновае. Яму адмаўляюць. Але ў той самы час яму не гавораць, што трэба зрабіць, як трэба выправіць, што не так. Яму кажуць: ідзі сядзі. А нам гавораць, што ў нас да яго прэтэнзій няма.
Па словах Валянціны Каваленкі, узмацненне ціску на яе сына пачалося пасля хваляванняў асуджаных у гэтай калоніі, якія адбыліся 3-4 лістападу 2018 году. Хаця ён у іх і не ўдзельнічаў.
Пікет Валянціны Каваленка працягваўся не доўга. Служба бяспекі адабрала плакат. Але жанчыну не затрымалі, а паабяцалі ў чарговы раз разабрацца. Таму Валянціна Каваленка вярнулася ў прыёмную і працягвала чакаць сустрэчы з кіраўніцтвам адміністрацыі прэзідэнта.
Цалкам матэрыял:
Беларускае Радыё Рацыя
