Пра ўчорашнюю колькасць захварэлых у Менску не паведамілі
Лік захварэўшых на каронавірус у Менску за апошнія содні дакладна невядомы. Застаецца толькі арыентавацца на афіцыйны агульнарэспубліканскі прырост у 459 чалавекі, які застаецца ў сярэднім нязменным на працягу апошняга тыдня па краіне.
Актуальны стан мераў і падзей на 22 красавіка ў беларускай сталіцы прадставіць наш карэспандэнт Вольга Сямашка:
– Пракуратура горада распачала першыя справы санкцыянавання прымусовага медычнага агляду ў стацыянарных умовах грамадзян, у дачыненні да якіх маюцца дастатковыя падставы меркаваць аб наяўнасцi ў iх інфекцыі, выкліканай каронавірусам COVID-19.
На менскім заводзе лядоўняў «Атлант» паведамілі, што сярод працаўнікоў прадпрыемства з’явіліся новыя хворыя на каронавірус.
Паўсотні кампаніяў-рэзідэнтаў беларускага Парку высокіх тэхналогіяў пералічылі грошы на дабрачынны рахунак Міністэрства аховы здароўя Беларусі.
Мабільныя аператары абвясцілі, што забяспечыць беларускіх медыкаў, занятых у барацьбе з распаўсюджваннем COVID-19, смартфонамі, планшэтамі, бясплатнымі рабочай сувяззю і Інтэрнэтам.
Працягваюцца мерапрыемствы па дэзінфекцыі жылых дамоў сталіцы.
У Менску закрыліся ўсе дзяржаўныя кінатэатры, апрача аднаго – пад паказальнай назвай – «Беларусь».
Беларускае Радыё Рацыя
