Прадстаўнік СААЗ: Беларусь усё яшчэ знаходзіцца ў досыць сур’ёзнай сітуацыі
Беларусь усё яшчэ знаходзіцца на стадыі лакальнай перадачы каронавіруснай інфекцыі COVID-19, і гэта досыць сур’ёзная сітуацыя, паведаміў журналістам афіцыйны прадстаўнік Сусветнай арганізацыі аховы здароўя (СААЗ) у Беларусі Батыр Бердыклычаў 12 чэрвеня ў Менску.
„Мы бачым, што з надыходам лета ў людзей назапасілася нейкая стомленасць, яны перастаюць усведамляць усё яшчэ існую небяспеку. Гэтая тэндэнцыя вельмі хвалюе, таму што вірус нікуды не падзеўся, небяспека захоўваецца, нягледзячы на некаторую стабілізацыю і зніжэнне колькасці новых зарэгістраваных выпадкаў”, — адзначыў ён.
На пытанне, за кошт чаго ідзе зніжэнне захворвання, Бердыклычев адказаў, што неабходна аналізаваць даныя. „Наколькі зніжэнне залежыць ад методык тэставання, колькасці праведзеных тэстаў? Беларусь нарасціла патэнцыял па лабараторным тэставанні, таму ў гэтым плане мы пакуль бачым пэўную стабілізацыю захворвання і нават зніжэнне. Але гэтыя працэсы неабходна назіраць у дынаміцы”, — лічыць прадстаўнік СААЗ.
Ён падкрэсліў, што „прыкмет сезоннасці ў гэтага віруса няма” — ён распаўсюджваецца і ў краінах з гарачым кліматам. „Таму спадзявацца, што летам вірус сам сыдзе, не даводзіцца. Усе рэкамендацыі застаюцца ранейшымі: рэспіраторны этыкет, гігіена рук, фізічнае дыстанцыяванне, а дзе яно немагчымае — нашэнне масак”, — сказаў Бердыклычаў.
Гаворачы аб прагнозах развіцця сітуацыі з COVID-19, прадстаўнік СААЗ адзначыў, што іх рабіць вельмі складана. „Мы можам арыентавацца на досвед іншых краін, у тым ліку постсавецкіх, дзе назіраўся высокі ўзровень інфекцыі і росту хворых. Пасля ўвядзення строгіх абмежавальных мер колькасць новых выпадкаў зніжалася. Зараз у шэрагу краін — Арменіі, Азербайджане, Паўночнай Македоніі — пасля зняцця абмежаванняў зноў пачаўся ўздым захворвання. Гэта сведчыць аб тым, што насельніцтва ўсё яшчэ ўспрымальнае да віруса, і неабходна камбінаваць меры стрымлівання інфекцыі, да якіх адносяцца тэставанне, ізаляцыя, лячэнне і адсочванне кантактаў, а таксама меры зніжэння шкоды. Гэта значыць, калі мы бачым, што магчымасць сістэмы аховы здароўя падыходзяць да мяжы, яна не можа справіцца з патокам пацыентаў, неабходнае ўвядзенне нейкіх абмежавальных мер. Камбінацыя гэтых мер, змяшаны паход — гэта найбольш правільна”, — сказаў ён.
Бердыклычаў лічыць заўчасным прамое параўнанне паказчыкаў смяротнасці ад COVID-19 у розных краінах. „Гэты паказчык залежыць ад методык, якія выкарыстоўваюць краіны пры рэгістрацыі смерцяў, і, вядома, лічбы будуць мяняцца. Мы ведаем, што шэраг краін рэтраспектыўна змянілі гэтыя паказчыкі, калі памянялі крытэрыі рэгістрацыі смерцяў”, — сказаў ён.
Паводле яго слоў, СААЗ як і раней рэкамендуе краінам, у тым ліку Беларусі, падтрымліваць „добры ўзровень інфармавання” насельніцтва аб сітуацыі з каронавірусам. „Пастаяннае інфармаванне аб рызыках, аб сітуацыі і аб мерах неабходнай прафілактыкі вельмі важнае”, — адзначыў ён.
Бердыклычаў дадаў, што па сітуацыі з COVID-19 СААЗ карыстаецца інфармацыяй Міністэрства аховы здароўя Беларусі. „Згодна з міжнароднымі медыка-санітарнымі правіламі міністэрства СААЗ дае інфармацыю аб колькасці новых выпадкаў, колькасці смерцяў. Мы не верыфікуем і не збіраем гэтую інфармацыю паралельна, гэта прэрагатыва Міністэрства аховы здароўя. Вядома, мы працуем з міністэрствам над паляпшэннем і стандартызацыяй гэтай інфармацыі для таго, каб можна было праводзіць параўнанне”, — сказаў ён.
Гаворачы пра методыку выкарыстання для лячэння цяжкіх выпадкаў захворвання, выкліканага каронавірусам, імуннай плазмы пацыентаў, якія ўжо перахварэлі COVID-19, ён адзначыў: „На сёння мы прызнаем выкарыстанне плазмы тых, хто перахварэлі COVID-19, як адзін з эксперыментальных метадаў лячэння каранавіруса, таму што былі атрыманыя даволі пазітыўныя вынікі пры лячэнні іншых захворванняў, напрыклад ліхаманкі Эбола. Сёння імунную плазму выкарыстоўваюць у многіх краінах у якасці клінічных выпрабаванняў, і тут вельмі важна назіраць за вынікамі, каб прыйсці да канчатковага заключэння аб карысці такога метаду”.
Паводле інфармацыі РНПЦ трансфузіялогіі і медыцынскіх біятэхналогій, з красавіка плазму крыві з антыцеламі да COVID-19 здалі ўжо больш за 250 чалавек, якія перахварэлі каронавірусам. Некаторыя здавалі плазму тры-чатыры разы, зроблена больш за 300 данацый.
Паводле звестак Міністэрства аховы здароўя, на 11 чэрвеня колькасць пацверджаных выпадкаў каранавіруснай інфекцыі COVID-19 у Беларусі дасягнула 51.816, памерла 293 чалавекі.
belapan.by
