Праграма “Свята Незалежнасці” 25 сакавіка ў Менску
25 сакавіка ў Менску на плошчы каля Вялікага тэатра оперы і балета адбудзецца маштабны фестываль да 100-годдзя абвяшчэння незалежнасці Беларускай Народнай Рэспублікі “Свята Незалежнасці”. Мерапрыемства афіцыйна дазволена Менгарвыканкамам.
Гаворыць дырэктар „АртСядзібы”, заяўнік мерапрыемства Алесь Снег:
– Гэта будзе канцэртная частка, дзе будуць выступаць гурты „Akute”, „Amaroka”, „Мутнаевока”, Ігар Варашкевіч з гурта „Крама”, Стыльскі з гурта „Дай дарогу!” ды іншыя. Будуць сюрпрызы музычныя. Акрамя гэтага будзе вялікі „Спеўны Сход”, у нас будзе Сяржук Доўгушаў, які навучыць спяваць песні звязаныя з Беларускай Народнай Рэспублікай.
Арганізатары „Свята Незалежнасці” вырашылі адмовіцца ад фармату правядзення традыцыйнага мітынга, кажа Алесь Снег:
– Бывае сустракаюцца каментары, калі людзі пішуць, што Дзень Волі – гэта толькі канцэрт. Нібыта толькі музычная частка, іншых не бачаць, але гэта не так. Мітынг ёсць, але гэта не будуць звычайныя выступы палітыкаў, буду трымаць у таямніцы, як гэта будзе выглядаць.
Аргкамітэт кампаніі #БНР100 правёў вялікую падрыхтоўчую працу і 15 сакавіка, за 10 дзён да свята, прэзентуе на Naviny.by папярэднюю праграму і афішу мерапрыемства.
Падрабязная і канчатковая праграма “Свята Незалежнасці” з мапай фестывалю будуць апублікаваныя за некалькі дзён да юбілейнай даты.
25 сакавіка а 13-й гадзіне пачатак Урачыстага збору. З гэтага часу на галоўнай сцэне Свята пачнецца музычная праграма з выступамі гуртоў “Мутнаевока” і Amaroka.
Паралельна на тэрыторыі фестывалю распачнуць працу тэматычныя пляцоўкі:
♦ пляцоўка “Вуліца БНР” з прэзентацыйнымі стэндамі і зонамі актыўнасцяў ад творчых, культурніцкіх, грамадскіх і палітычных арганізацый краіны;
♦ пляцоўка “Ежа БНР” з кропкамі харчавання, дэгустацыйнымі стэндамі, фуд-кортамі і беларускімі стравамі;
♦ пляцоўка “Кірмаш БНР” з сувенірамі і падарункамі ў нацыянальным стылі, беларускамоўнай літаратурай і настольнымі гульнямі, прэзентацыяй разнастайнай прадукцыі да 100-годдзя БНР;
♦ пляцоўка “Дзеткі БНР” з адукацыйна-забаўляльнымі заняткамі для дзетак, гульнямі і аквагрымам у нацыянальным стылі.
А 14-й гадзіне пачнецца ўрачыстае адкрыццё “Свята Незалежнасці”, якое правядуць легендарная дыктарка беларускага тэлебачання Зінаіда Бандарэнка і вядучы тэлеканалу “Белсат” Усевалад Сцебурака.
У межах урачыстай часткі запланаваныя выступы запрошаных гасцей свята, зачытванне 3-й Устаўной граматы, тэатральна-музычная праграма з удзелам актораў “Свабоднага тэатра” і музыкаў. Спявачка Таццяна Грыневіч і мужчынскі хор Headspring выканаюць нацыянальныя гімны беларусаў “Мы выйдзем шчыльнымі радамі”, “Магутны Божа” і “Пагоня”.
З 15:00 да 19:00 на галоўнай сцэне Свята запланаваныя выступы Ігара Варашкевіча і гурта “Крама”, Касі Камоцкай з песнямі гурта “Новае Неба”, Пятра Клюева з беларускамоўнымі хітамі XXI стагоддзя, лідара гурта “Дай Дарогу!” Юрыя Стыльскага, папулярных гуртоў Akute, “РСП”, Dzieciuki. Выступы яшчэ некалькіх вядомых гуртоў будуць аб’яўленыя за некалькі дзён да 25 сакавіка.
Весці музычна-забаўляльную частку свята будуць акторы “Свабоднага тэатра” Аляксей Сапрыкін і Юлія Шаўчук.
У межах Свята на галоўнай сцэне таксама адбудуцца:
♦ анлайн-прэзентацыя песні Лявона Вольскага да 100-годдзя абвяшчэння незалежнасці Беларускай Народнай Рэспублікі;
♦ Спеўны сход з Сяржуком Доўгушавым з праграмай “Песні і гімны БНР”;
♦ розыгрыш падарункаў ад генеральнага партнёра свята — беларускай інфармацыйнай кампаніі БелаПАН, ад афіцыйных спонсараў: кампаніі “Цесляры”, гульнявой прасторы Quvalda, каталога беларускамоўнага бізнесу і паслугаў “Свае.бел”, крамы “Мой модны кут”, Мінскага гадзіннікавага завода „Луч”;
♦ віншавальныя выступы ад вядомых і паважаных беларусаў ды прадстаўнікоў арганізатараў свята: Партыі БНФ, руху “За Свабоду”, установы “Амарока” (Арт Сядзібы), Аб’яднанай грамадзянскай партыі і Беларускай сацыял-дэмакратычнай партыі (Грамады).
Галоўная пляцоўка фестывалю будзе абсталяваная вялікімі экранамі з трансляваннем выступаў гасцей і музыкаў на сцэне, відэа-віншаваннямі ад паважаных беларусаў з усяго свету, праектаваннем тэкстаў песень падчас “Спеўнага сходу” ды іншай святочнай візуалізацыяй.
Уваход на мерапрыемства вольны. Набыць сімвалічны квіток і падтрымаць падрыхтоўку “Свята Незалежнасці” варта на Talaka.by.
► Фірмовы стыль Свята і 100-годдзя БНР можна спампаваць тут.
► Афіцыйны сайт мерапрыемства: bnr100.by.
► Падзеі ў сацыяльных сетках — VK, FB.
Дата правядзення: 25 сакавіка 2018 года.
Месца: плошча Парыжскай Камуны, 1 (пляцоўка каля Вялікага тэатра оперы і балета).
Час мерапрыемства: 13:00 — 19:00.
Глядзіце таксама
