Пракуратура праігнаравала заяву аб катаваннях Вольгі Хіжынковай
Пракуратура горада Менска адказала на заяву Міжнароднага камітэта па расследаванні катаванняў у Беларусі па праверцы ўмоў утрымання Вольгі Хіжынковай.
Праваабаронцы паказвалі на катаванні ў дачыненні да Хіжынковай, у тым ліку неаказанне медыцынскай дапамогі, знаходжанне без зубной пасты, шчотак, ручнікоў і зменнай бялізны чатыры дні з моманту затрымання, а таксама патрабавалі ад пракуратуры наведаць Вольгу ў ЦІП, запатрабаваць запісу відэакамер з калідораў, камеры і ўнутранага дворыка ЦІП, запатрабаваць звесткі аб аказанні медыцынскай дапамогі і звесткі аб праводзімых санітарна-эпідэміялагічных мерапрыемстваў, паведамляе REFORM.by.
Адказ пракуратуры апублікаваны на сайце legin.by. У адказе, падпісаным начальнікам аддзела па наглядзе за выкананнем заканадаўства і законнасцю прававых актаў Дзянісам Шапавалавым, паказваецца, што грамадзяне могуць звяртацца ў дзяржорганы асабіста або праз сваіх прадстаўнікоў, але ў выпадку Хіжынковай праваабаронцы не могуць лічыцца яе прадстаўнікамі, бо не прыклалі электронныя копіі дакументаў, якія пацвярджаюць іх паўнамоцтвы.
«Паколькі заяўнікамі не прадстаўлены якія-небудзь дакументы, якія пацвярджаюць іх паўнамоцтвы на прадстаўленне інтарэсаў Хижынковой В.М., зварот пакінуты без разгляду па сутнасці», — гаворыцца ў адказе.
Вольга Хіжынкова, вядомая топ-мадэль і ўладальніца тытула «Міс Беларусь-2008», была затрыманая 8 лістапада падчас акцыі пратэсту ў Менску. Ёй прысудзілі 12 сутак арышту па артыкуле 23.34 КаАП, а затым яшчэ два тэрміны па 15 сутак. Яна выйшла на волю 20 снежня.
