Работнікі пошты папрасілі ў Табулы прабачэння
Рэспубліканскае ўнітарнае прадпрыемства сувязі “Белпошта” прызнала віну супрацоўнікаў Мікашэвіцкай пошты ў дачыненні да паштовай карэспандэнцыі былога інжынера “Граніта” Уладзіміра Табулы.
У адказе “Белпошты” паведамляецца аб пазбаўленні прэміяльных за люты месяц мікашэвіцкае паштовае кіраўніцтва Рачынскую і Лукашэвіч, а начальніку Лунінецкай раённай пошты Ніне Дударзе ўказана на недастатковы кантроль за працай падраздзяленняў, кажа Уладзімір Табула:
– Ніна Васільеўна катэгарычна не хацела прызнаваць усе парушэнні. Аднак, пасля таго, як інфармацыя з’явілася на Беларускім Радыё Рацыя, яна змяніла свё меркаванне.
Калі скандальны факт з карэспандэнцыяй Табулы атрымаў агалоску ў прэсе, у той жа дзень начальнік раённай пошты патэлефанавала Уладзіміру Табуле і папрасіла прабачэння:
– Прабачце нашых работнікаў за парушэнні. Па іх тлумачэннях – ніякага злога намеру ў іхных дзеяннях не было.
Уладзімір Табула судзіцца з прадпрыемствам “Граніт” за незаконнае звальненне. Шмат вядзе перапіскі з дзяржаўнымі органамі. І заўважыў, што на “Граніце” даведваюцца аб адказах да яго раней, чым ён сам. Лісты былі без зваротнага штэмпеля, ішлі доўга і чамусьці траплялі ў скрыню ягонай маці, што жыве па іншым адрасе.
Беларускае Радыё Рацыя
