Працягваецца ціск на ўдзельнікаў акцыі ў Свіслачы
Сын грамадскага актывіста Алеся Меха з Кобрына Антон атрымаў папярэджанне за ўдзел у акцыі ўшанавання памяці паўстанцаў Каліноўскага ў Свіслачы.
Антон Мех вучыцца ў Польшчы па праграме Каліноўскага, таму на камісіі па справах непаўнагадовых яго прадстаўляў бацька Алесь Мех.
Па яго патрабаванню прыехалі на пасяджэнне і свіслацкія сведкі-міліцыянты Юры Садоўскі і Дзяніс Паўлючэня:
– Пасяджэнне цягнулася паўтары гадзіны, аргументавалася відэастужкай, дзе яны здымалі нас падчас ушанавання памяці герояў паўстанцаў Каліноўскага. Яны казалі: “Вось глядзіце, яны там ідуць у арганізаванай калоне”. Ім хапіла таго, што мы ішлі па пешаходнай сцежцы.
Алесь Мех лічыць, што праз сына ціснуць на яго, як аднаго з арганізатараў беларускага народнага руху за незалежнасць.
Беларускае Радыё Рацыя
