Праваабаронца патрабуе ў мытні свой ноўтбук
Гомельскі праваабаронца Леанід Судаленка, у якога ў пункце пропуску „Каменны Лог” Ашмянская мытня без тлумачэння прычын канфіскавала ноўтбук, звярнуўся са скаргай да старшыні Мытнага камітэта Юрыя Сянька.
Ад кіраўніка мытнага ведамства праваабаронца патрабуе неадкладна вярнуць ноўтбук, а таксама паказвае на сістэматычнае парушэнне яго правоў ашмянскімі мытнікамі:
– У скарзе згадаў адно з рэшэнняў Камітэта па правах чалавека ААН – Судаленка супраць Беларусі. Гэта з 2010 года, калі гэтая ж Ашмянская мытня ў гэтым жа пункце пропуску “Каменны Лог”, яны таксама тады канфіскавалі перадвыбарчую літаратуру і Камітэт ААН прыняў рашэнне, што Беларусь краіна-ўдзельніца міжнароднага пакту парушыла мае правы. Прыклаў гэтае рашэнне ды кажу, што супрацоўнікі Ашмянскай мытні сістэматычна парушаюць мае правы на атрыманне і распаўсюд інфармацыі, і каб вярнулі тое, што забралі.
„Маё прозвішча чамусьці апынулася ў палітычных спісах, так званых „спісах па даручэнні праваахоўных органаў”, якія незаконна дзейнічаюць на беларускай мяжы. Склалася ўстойлівае ўражанне, што працягваюцца пагрозы і запалохванне, якія пачаліся ў дачыненні да мяне і маіх дзяцей у пачатку года”, – адзначыў праваабаронца.
Антон Разумоўскі, Беларускае Радыё Рацыя
