Праваабаронцы паведамляюць пра больш чым 400 затрыманых у нядзелю
Праваабаронцы паведамляюць прыкладна пра больш чым 400 затрыманых у Менску і іншых гарадах падчас чарговай нядзельнай акцыі прыхільнікаў перамен — Маршу гонару 11 кастрычніка. Спісы затрыманых публікуе spring96.org.
У ліку затрыманых мінімум 35 супрацоўнікаў СМІ. У Менску затрыманыя 20 журналістаў, у Гародні — 5, Віцебску — 4, Гомелі — 3, Берасце — 2, Магілёве — 1.
Супрацоўнікі БелаПАН затрыманыя ў Менску (Таццяна Каравянкова, Сяргей Сацюк і Алена Талкачова), Гародні (Марына Харэвіч і Сяргей Людкевіч), Віцебску (Таццяна Мацвеева), Магілёве (Алесь Асіпцоў), Гомелі (Алена Германовіч) і Берасці (Мілана Харытонава і Алесь Ляўчук).
Затрыманні журналістаў у розных падраздзяленнях МУС тлумачаць аднатыпнай фразай: супрацоўнікі СМІ не затрыманыя, а дастаўлены ў міліцыю для праверкі дакументаў.
Супраць дэманстрантаў падчас акцыі ў Менску ўжываліся вадамёты з аранжавай вадкасцю і святлошумавыя гранаты.
Фота nashaniva.by
