Публічны прагляд лекцыі Алексіевіч у Берасці
Нобелеўскую лекцыю беларускі Святланы Алексіевіч публічна паглядзелі ў Берасці. Ідэю калектыўнага прагляду прапанавалі сваім студэнтам выкладчыкі курсаў „МОВА НАНОВА”.
Кажа адна з вядоўцаў курсаў Вольга Малафеечава:
– Мы сёння не маглі не закрануць Нобелеўскую прэмію таму, што на гэтым тыдні адбудзецца ўрачыстая цырымонія. Мы вырашылі таксама падчас нашых заняткаў, акрамя тэмы спорт і звычайных нашых заданняў, зрабіць яшчэ супольны прагляд відэалекцыі. Мы загадзя папярэдзілі студэнтаў у нашых суполках пра тое, што мы будзем глядзець гэтую лекцыю.
Акрамя ўласна лекцыі, госці берасцейскіх курсаў сустрэліся з менеджарам баскетбольнага клуба „Цмокі-Менск” Аляксандрам Кулем, які акрамя тэмы карыстання беларускай мовай у спорце, закрануў і тэму ўручэння Нобелеўскай прэміі нашай суайчынніцы.
„Святлана Алексіевіч сваёй творчасцю, сваімі намаганнямі дасягнула такой вышыні, прыемна жыць у адзін час з такімі людзьмі”, – сказаў вядомы беларускі спартовец.
Мікола Ляшкевіч, Беларускае Радыё Рацыя, Берасце
