Пятро Парашэнка ўшанаваў памяць Міхаіла Жызнеўскага
Прэзідэнт Украіны Пятро Парашэнка разам са сваёй жонкай Марынай 22 студзеня ўшанавалі памяць Міхася Жызнеўскага і Сяргея Нігаяна, якія сталі першымі ахвярамі падчас брутальных сутычак паміж пратэстоўцамі і сілавікамі на Еўрамайдане.
Сёння трэцяя гадавіна з дня трагічнай гібелі актыўных удзельнікаў украінскай рэвалюцыі Годнасці і Свабоды.
Міхась Жызнеўскі загінуў ад кулі 22 студзеня 2014 года на вуліцы Грушэўскага ў Кіеве падчас Еўрамайдану. Да свайго 26-годдзя ён не дажыў чатыры дні.
Цела Міхася Жызнеўскага пасля адпявання і ўрачыстых провадаў прывезлі з Кіева і пахавалі на родавых могілках па лініі маці ў вёсцы Сцяг Працы пад Гомелем.
Прэзідэнт Украіны Пятро Парашэнка пасмяротна ўзнагародзіў Міхася Жызнеўскага Ордэнам Герояў Нябеснай Сотні. Летась у лютым украінскі ўрад прызначыў пажыццёвую стыпендыю ягоным бацькам Ніне і Міхасю Жызнеўскім.
Паводле svaboda.org
