Пяць гадоў таму на Майдане загінуў Міхаіл Жызнеўскі
Пяць гадоў таму загінуў Міхаіл Жызнеўскі, які стаў адной з першых ахвяраў Рэвалюцыі годнасці.
Ён загінуў ад агнястрэльнага ранення падчас вулічнага супрацьстаяння з міліцыяй.
Яго згадвае гарадзенец Дзяніс Івашын, які ў той час быў у Кіеве:
– На той час хадзіў увесь час з бел-чырвона-белым сцягам. Натуральна ён пабачыў, падышоў сам да мяне наўрост, мы пазнаёміліся. З таго моманту мы падтрымлівалі такія пабрацімскія адносіны. Я непасрэдна знаходзіўся ў Першай сотні львоўскай самаабароны, ён быў актывістам адной з соцен Майдана.
Цалкам гутарку слухайце ў далучаным файле:
У памяць пра яго ў цэнтры ўкраінскай сталіцы ўсталяваны помнік.
Героя Небеснай сотні пахавалі на могілках ля вёскі Сцяг Працы, што пад Гомелем. Пазней, дзякуючы намаганням беларускай і ўкраінскай грамадскасці, на месцы пахавання быў усталяваны помнік. Бард Андрэй Мельнікаў адзначае, што ў час небяспекі ён павёў сябе годна:
– Ён загінуў маладым, але ён загінуў сапраўды дзеля вялікай, як бачым, ролі. Ён жывы прыклад таго, што засталося пасля яго. Мы едзем сюды і прасвятляемся, мы едзем сюды і робімся лепшымі. Я ўжо больш чым у два разы перажыў яго, я разумею, што вось гэтая смерць яго, яна дапамагае не так баяцца смерці і паспрабаваць таксама павесці сябе годна.
Акрамя Жызнеўскага 22 студзеня загінуў яшчэ адзін абаронца Еўрамайдану – Сяргей Нігаян. Абодвум пратэстоўцам прэзідэнт Украіны Пятро Парашэнка прысудзіў званне героя Украіны.
„Жызнеўскі. Воін святла” д/ф, рэж. Міхаіл Аршынскі (2016)
Беларускае Радыё Рацыя
