Рэктара БДУ запрасілі на марш студэнтаў
Нагадаем, рознагалоссі паміж студэнтамі і адміністрацыяй БДУ пачаліся пасля таго, як у ВНУ агучылі планы ўвесці аплату за пераздачу залікаў і экзаменаў. Універсітэцкую моладзь абурыла такая перспектыва. Студэнты сабралі супраць новаўвядзення больш за 2500 подпісаў, а ў соцсетцы «Вконтакте» паўстала група #студентыпротив.
Яе ўдзельнікі паведамілі пра намер заявіць на ВНУ ў пракуратуру, калі аплата за пераздачы будзе ўведзена.
Нягледзячы на пратэсты, 12 лістапада рэктар БДУ падпісаў палажэнне аб платных пераздачах. У адказ актывісты руху #студентыпротив запланавалі 2 снежня правесці ў Менску марш студэнтаў. Чакаецца, што да яго далучацца ад 300 да 500 чалавек.
Учора (26 лістапада) на старонцы „Укантакце” з’явілася завочнае запрашэнне рэктару. Актывісты лічаць, што прыход Сяргея Абламейкі на марш студэнтаў пацвердзіць яго гатоўнасць да дыялогу і спадзяюцца, што змогуць «вырашыць праблему з платнымі пераздачамі і адпрацоўкамі пропускаў сумесна».
«Вы шмат гаворыце ў сваіх публічных выступах пра цеснае супрацоўніцтва студэнтаў і адміністрацыі, пра ўлік нашага меркавання і адкрытасць да дыялогу. Нас жа, насупраць, папракаюць у тым, што мы не жадаем дыялогу і толькі дыктуем свае патрабаванні. Гэта выдатная пазіцыя! » – звярнуліся да рэктара студэнты. Верагодней за ўсё, актывісты маюць на ўвазе зварот Сяргея Абламейкі, які 24 лістапада быў апублікаваны на сайце БДУ.
У ім гаварылася, што ўніверсітэт абураны спробамі «некаторых арганізацый» перавесці пытанне аб платных пераздача з адукацыйнай і прававой плоскасці ў палітычную і ўцягнуць студэнтаў у «дэструктыўныя працэсы, закліканыя раскалоць акадэмічную супольнасць, скампраметаваць сістэму вышэйшай адукацыі краіны».
Паводле news.tut.by
Фота sb.by
