Русіфікацыя віцебскай “Бульбяной”
Кавярня “Бульбяная” ў цэнтры Віцебска – найстарэйшая ўстанова грамадскага харчавання з нацыянальнай кухняй. Яна з’явілася на скрыжаванні вуліц Леніна і Замкавай яшчэ ў 1962-м годзе і з тае пары не мяняла назву і профіль: наведнікі тут маглі падсілкавацца разнастайнымі стравамі з бульбы.
Праўда, апошнім часам у кавярні ўжо не гатавалі – яна стала структурнай адзінкай ААТ “Вітміл”, і сюды прывозілі гатовыя стравы. А некалькі дзён таму побач з назовам “Бульбяная” з’явіўся яшчэ адзін, расейскамоўны і шаблонны – “Время есть”.
Ці азначае гэта перайменаванне ўстановы, работнікі кавярні патлумачыць не могуць. Пакуль кавярня працуе з ранейшым асартыментам страваў і нязменным інтэр’ерам – рушнікамі на сценах, драўлянай мэбляй у народным стылі і гэтак далей. Аднак новы надпіс над уваходам спляжыў яшчэ адну беларускую гарадскую адметнасць: кавярня “Бульбяная” знаходзіцца ў самым цэнтры Віцебска, і яна заўсёды ўносіла хоць частачку нацыянальнага каларыту ў пераважна расейскамоўны шэраг назваў тутэйшых аб’ектаў.
Ганна Ліпка, Беларускае Радыё Рацыя
