Самы „гуманны” суд у свеце
Абласны суд Гародні не задаволіў касацыйных скаргаў грамадскіх актывістаў Васіля Корабава і Ежы Грыгенчы. Актывісты спрабавалі давесці суддзям, што штрафы, якія яны атрымалі за акцыю ў дзень Канстытуцыі 15 сакавіка, былі атрыманыя незаконна. Аднак суддзі пасля пяціхвіліннага разгляду пакінулі рашэнні аб штрафах у сіле.
Кажа Ежы Грыгенча:
– Мы чакалі, што нам усё роўна адмовяць. Прэзідэнт прызначае суддзяў, вось яны за яго і выступаюць. Яны не могуць па-іншаму судзіць, як ім скажуць – так і судзяць. Яны прызначаныя, а не абраныя народам. І баяцца яны не народа, а таго, хто іх прызначыў. Вось і ўсё. Будзем абскарджваць далей.
Прадстаўнік прафсаюза РЭП па Гарадзеншчыне Васіль Корабаў не здзіўлены рашэннем суддзі:
– Калі казаць з гумарам, то я скажу так: самы гуманны суд у свеце – гэта беларускі суд. Бо таго, што прымае ніжэйшы суд, вышэйшы суд ніколі не адменіць. Яны ж працуюць у адной запрэжцы. Не ведаю, што буду рабіць далей. Пракансультуюся ў сваіх знаёмых, а пасля будзем думаць.
Гарадзенскі праваабаронца Уладзімір Хільмановіч упэўнены, што ўсе суддзі працуюць па загадзе:
– Усё па накатанай каляіне, звыклым сцэнары: разгляд – пяць хвілін, перапынак на ўдакладненне – 10 хвілін, і чаканы вынік. За апошнія 15 гадоў я не памятаю ніводнага выпадку, каб абласны суд задаволіў касацыйную скаргу якога-небудзь грамадскага актывіста, які быў несправядліва аштрафаваны ці засуджаны да адміністрацыйнага арышту. Сістэма працуе бездакорна. Яна скіравана выключна на рэпрэсіўнасць.
Грамадскія актывісты збіраюцца надалей змагацца за адмену рашэнняў па штрафах і будуць звяртацца ў Вярхоўны суд і Камітэт па правах чалавека.
Беларускае Радыё Рацыя, Гародня
