Шыльды БНР у Гародні пакуль не будзе
Кіраўнік грамадскай ініцыятывы „Гародня”, актывіст АГП Анатоль Мышкевіч ўпэўнены, што рашэнне на ўсталяванне шыльды ў гонар Беларускай Народнай Рэспублікі ў Гародні – палітычнае. Яе не будзе, пакуль падобную шыльду не ўсталююць у Менску:
– У адзін момант выклікалі прадстаўнікоў „Саюза мастакоў” у наш гарвыканкам і проста запужалі. Пасля гэтай сустрэчы яны патэлефанавалі, мы дамовіліся сустрэцца, сказалі, што ім проста даходліва патлумачылі, што калі яны хочуць далей спакойна працаваць і жыць, то гэтым пытаннем займацца нельга. Гэтае пытанне больш не палітычнае, а гістарычнае, і пакуль у Менску не з’явіцца шыльда, тут адназначна ім ніхто не дасць яе ўсталяваць.
На думку Анатоля Мышкевіча, усталёўваць шыльду ў Гародні баяцца нават чыноўнікі:
– Нават чыноўнікі баяцца браць на сябе адказнасць, бо баяцца згубіць свае крэслы.
Гарадзенцы планавалі ўсталяваць памятную шыльду на адным з дамоў, дзе ў 1919 годзе адбываліся пасяджэнні Рады БНР. Такіх будынкаў у Гародні некалькі, але пакуль лёс шыльды застаецца пад пытаннем.
Беларускае Радыё Рацыя, Гародня
