Следчы адмовіў палітвязню Пачобуту ў спатканні з жонкай і дачкой
«Следчы мае права дазваляць спатканні блізкім сваякам і членам сям’і з асобай, якая знаходзіцца пад вартай, … аднак наданне вам спаткання ў гэты момант уяўляецца немэтазгодным», — гаворыцца ў адмове, падпісанай следчым Дзмітрыем Ганчарыкам.
Дакумент апублікавала ў сябе ў фэйсбуку жонка палітвязня Андрэя Пачобута Аксана. Аб спатканні прасіла і дачка Андрэя Яна.
Раней стала вядома, што актывісты Саюза палякаў Беларусі і лідары інтэлігенцыі польскай нацыянальнай меншасці Андрэй Пачобут і Анжаліка Борыс адмовіліся ад вызвалення ўзамен за згоду пакінуць радзіму. У той жа час тры іншыя польскія актывісткі гэтай магчымасцю скарысталіся. Пазней прэс-сакратарка Аляксандра Лукашэнкі расказала, што з просьбай аб вызваленні палякаў да яго звяртаўся былы прэзідэнт Казахстана Нурсултан Назарбаеў.
Андрэй Пачобут знаходзіцца ў турме №8 горада Жодзіна.
Па выніках вывучэння ягонай справы праваабаронцы прызналі яго палітвязнем.
