Створана інтэрнэт-платформа для падтрымкі дваровых ініцыятыў
Каардынацыйная рада (КР) па ўрэгуляванні палітычнага крызісу ў краіне сумесна з шэрагам грамадзянскіх ініцыятыў стварылі інтэрнэт-платформу kotos.org для падтрымкі дваровай і раённай актыўнасці і арганізацыі мясцовага самакіравання, паведаміў на прэс-канферэнцыі 12 кастрычніка ў Менску член КР, сустаршыня аргкамітэта па стварэнні партыі „Беларуская хрысціянская дэмакратыя” Віталь Рымашэўскі.
„Такога Беларусь яшчэ не бачыла, каб у кожным двары, у кожным мікрараёне грамадзяне краіны бралі адказнасць за арганізацыю дваровых канцэртаў, роспісаў муралаў, па сутнасці — за арганізацыю мясцовага самакіравання, — сказаў ён. — На жаль, гэтыя ініцыятывы вельмі часта сутыкаюцца з праблемамі, калі органы дзяржаўнай улады прыязджаюць, спрабуюць чыніць розныя перашкоды арганізацыі абсалютна законнай дзейнасці. І сёння, каб падтрымаць рэгіянальных актывістаў і ўвесці гэтую актыўнасць у прававыя межы, мы прэзентуем новую платформу kotos.org”.
Паводле слоў палітыка, на гэтым сайце сабраныя звесткі, звязаныя з заканадаўчым аспектам функцыянавання мясцовага самакіравання ў Беларусі. Ён падкрэсліў, што ў нацыянальным заканадаўстве ўжо ёсць палажэнні аб калегіяльных органах тэрытарыяльнага грамадскага самакіравання (КОТГС).
„Гэта значыць, што людзі на сходах могуць выбраць сабе кіраванне двароў, мікрараёнаў, раёнаў, — растлумачыў Рымашэўскі. — Рэальна ў нашай краіне да 2020 года гэтыя ініцыятывы заставаліся толькі на паперы, таму што ні адзін сход у нашай краіне не праходзіў, а старшыні КОТГС, нават самыя актыўныя, проста прызначаліся альбо дэпутатамі мясцовых саветаў, альбо выканкамамі — у парушэнне дзейнага заканадаўства”.
„Сёння любы ахвотны грамадзянін Беларусі, аб’яднаўшыся ў сваім двары разам са сваімі сябрамі, аднадумцамі, можа сабраць подпісы і ініцыяваць сход у падтрымку новага кіраўніцтва мясцовага самакіравання. Для гэтага дастаткова арганізаваць ініцыятыўную групу, сабраць 25% подпісаў жыхароў, якія пражываюць на тэрыторыі гэтага КОТГС, правесці сход і выбраць сабе кіраўніцтва”, — дадаў ён.
Паводле слоў Рымашэўскага, КОТГС можа афіцыйна займацца ўпарадкаваннем двароў, арганізоўваць дваровыя канцэрты, адукацыйныя мерапрыемствы, сустрэчы з жыхарамі, праводзіць клубы выхаднога дня, легальна фармаваць дружыны па падтрыманні грамадскага парадку.
На сайце, звярнуў увагу палітык, можна пакінуць заяўку на кансультацыю з юрыстамі па арганізацыі дваровых выбараў у мясцовае самакіраванне, а таксама папрасіць аб дапамозе ў арганізацыі канцэрта або адукацыйнага мерапрыемства.
Член прэзідыума Каардынацыйнай рады, кіраўнік стачкама МТЗ (на заводзе ўжо не працуе) Сяргей Дылеўскі заявіў, што КР „ставіцца да такіх ініцыятывам вельмі станоўча”, таму што „вельмі важна ў наш няпросты час і ў сітуацыі, якая склалася, аб’ядноўваць двары, кансалідаваць людзей”.
„Людзі, якія раней не ведалі суседзяў, сталі знаёміцца, сталі добрымі сябрамі, — канстатаваў Дылеўскі. — Наша задача на гэты момант — дапамагчы ім арганізавацца, дапамагчы ў арганізацыі баўлення часу, нейкіх культурных мерапрыемстваў. І галоўнае — зрабіць усё, каб гэта было законна”.
Дэпутат Мінгарсавета Вольга Цесакова пацвердзіла, што заканадаўствам „прадугледжаная грамадская ініцыятыва і мясцовае самакіраванне”. „Проста ў нас былі інструменты, якімі мы не карысталіся, магчыма з прычыны асацыяльнасці, апалітычнасці людзей”, — адзначыла яна.
„Але гэта ўсё ёсць, і наша зараз задача — удыхнуць у гэта ўсё другое жыццё і зрабіць так, каб гэта працягвала працаваць, — сказала Цесакова. — Знаёмцеся з паняццем „КОТГС”, са старшынямі КОТГС, якія ўжо створаныя, знаёмцеся са сваімі дэпутатамі мясцовых саветаў, таму што звычайна ў нармальнай сітуацыі менавіта мясцовыя саветы наўпрост працуюць з КОТГС”.
„Гэта выдатны спосаб рэалізацыі новых культурных, сацыяльных і эканамічных магчымасцей. Я заклікаю ўсіх уключацца ў тое, што адбываецца, мець зносіны не толькі з нагоды святаў, афарбоўкі лавачак у бел-чырвона-белы колер, муралаў. Трэба разумець, што акрамя правоў ёсць абавязкі. І мы можам павярнуць гэтыя абавязкі нам на карысць. Мы можам зрабіць так, каб пабудова грамадзянскай супольнасці пачыналася з нашых кватэр, дамоў, двароў. Дэпутаты гатовыя ў гэтым дапамагаць — абсалютна ўсе, незалежна ад поглядаў. Гэта тое, з чым мы працуем, з чым мы павінны і будзем працаваць”, — заявіла Цесакова.
Заснавальнік і ўладальнік крамы нацыянальных тавараў Symbal.by Павел Белавус і дырэктар Цэнтра еўрапейскай трансфармацыі Андрэй Ягораў, якія таксама з’яўляюцца членамі КР, расказалі, як яны могуць дапамагчы дваровым ініцыятывам наладзіць кантакт з творчай супольнасцю і арганізаваць адукацыйныя мерапрыемствы.
