Стыпендыяльны конкурс для студэнтаў з картай паляка
Таварыства „Wspólnota Polska” абвесціла стыпендыяльны конкурс для студэнтаў, якія валодаюць картай паляка і вучацца ў польскіх універсітэтах. Дакументы на атрыманне стыпендыі прымаюцца да 23 кастрычніка. Памер грашовай дапамогі на першы семестр складае 4 500 злотых брута. Грашовую дапамогу могуць атрымаць і грамадзяне Беларусі, якія вучацца ў Польшчы. Такіх студэнтаў становіцца з кожным годам усё больш і больш – зазначае дырэктарка грамадскай школы пры Саюзе палякаў Хэлена Дубоўская:
– Вельмі шмат вучняў з нашай школы трапляе ў гэтыя ўстановы па конкурсе атэстатаў. Польская адукацыя трымае свой узровень навучання. Мне падаецца, што іх мары здзейсняцца, бо шмат дарог адкрываецца дзякуючы гэтай адукацыі.
Стыпендыя таварыства „Wspólnota Polska” выплочваецца з датацыі Міністэрства замежных спраў Польшчы ў межах конкурсу “Супраца з Палоніяй і палякамі за мяжой у 2015 годзе”. Галоўная ўмова для атрымання стыпендыі – адсутнасць фінансавай дапамогі з іншых крыніц і добрыя вынікі вучобы.
Беларускае Радыё Рацыя, Гародня
Фота clevelandfoundation.org
Глядзіце таксама
