Суд над «Тэрор-машынай» у Віцебску
У Віцебску пачаўся разгляд судовай справы супраць шасці беларускіх грамадзянаў, якіх вінавацяць у хуліганстве і іншых злачынствах. Галоўны фігурант справы – Станіслаў Ганчароў – вядомы пад мянушкай “Тэрор-машына”.
Станіслаў Ганчароў быў затрыманы ў Беларусі сёлета 18 красавіка. Беларускія медыя паведамлялі, што ён служыў у батальёне “Азоў” і ваяваў на баку Украіны. Таксама паведамлялася, што затрыманы прытрымліваўся, відавочна, неанацысцкіх поглядаў і меў на целе адпаведныя татуажы.
Ва Украіне разумеюць, што абсалютная большасць беларусаў, якія ваююць на ўкраінскім баку, не падзяляюць нацыскія погляды Гарчарова і што гэты суд, імаверна, будзе скарыстаны ўладамі для ціску на ўсіх беларускіх добраахвотнікаў, якія ваююць у Антытэрарыстычнай аперацыі.
Сітуацыю каментуе Аляксей Клімовіч, які ў якасці валанцёра дапамагаў батальёну “Азоў”:
– Калі падключыцца прапагандысцкая машына як з боку беларускіх СМІ, так і расейскіх, а карцінку яны рабіць умеюць, – гэтаму нам у іх яшчэ вучыцца і вучыцца – розгалас і рэзананс гэтай падзеі будзе даволі моцны, пакіне нядобры для нас след. Гэта будзе яшчэ адной падставай для ўзмацнення ціску.
Паведамляецца, што суд над Станіславам Ганчаровым будзе закрытым.
Беларускае Радыё Рацыя
