Sunday: вялікі аўтафэст каля Гародні – у гэтыя выходныя
Міжнародны аўтамабільны фэст Sunday адбудзецца 21 ліпеня 2018 года ўжо 9 раз на беразе Юбілейнага возера каля Гародні. Фэст – гэта паказ унікальных аўтамабіляў, а таксама вялікі канцэрт і гульні для дзетак і дарослых.
Пра будучае мерапрыемства распавядае адзін з арганізатараў Міхаіл Кунцэвіч:
– Унікальны фестываль, куды прыязджае ўжо каля 400 рэдкіх аўтамабіляў з васьмі краін. У гэтым годзе будуць прадстаўленыя Германія, Польшча, Літва, Латвія, Эстонія, Расея, Украіна і ўся Беларусь. Зараз многія фестывалі называюцца фестывалямі незаслужана. Фестываль – гэта месца, дзе не толькі нейкая выстава, але і насычаная культурная праграма. Sunday па праву носіць гэтае званне.
Самай галоўнай адметнасцю гэтага аўтафэсту, на думку Міхаіла Кунцэвіча, будзе паказ старых аўтамабіляў:
– Па-першае, едзе самая старая Mazda, якая знаходзіцца на постсавецкай прасторы. Едуць такія легендарныя суперкары, як Chevrolet Camaro, Chevrolet Corvette. Будзе некалькі легендарных аўтамабіляў даваенных. Усё гэта працуе. Кожны зможа як пасядзець у гэтым аўтамабілі, так і зрабіць фота.
У мінулыя гады на фэст Sunday прыязджала больш за некалькі тысячаў аматараў аўтамабіляў, і ў гэтым годзе арганізатары, а гэта сайт autogrodno.by ды Гарадзенскі райвыканкам, прыкладаюць усе намаганні, каб сабраць як мага больш наведнікаў.
Беларускае Радыё Рацыя, Гародня
Фота tut.by
Глядзіце таксама
