„Свята Незалежнасці” ў Гародні
Гарадзенцы будуць адзначаць 100-годдзе БНР тры дні — з 23-га па 25-га сакавіка.
Пра план гарадзенскіх мерапрыемстваў да гэтай юбілейнай даты распавядае сябра аргкамітэта, кіраўнік Партыі БНФ па Гарадзеншчыне Вадзім Саранчукоў:
– У пятніцу а 18:30 адбудзецца літаратурная вечарына, прысвечаная стогадоваму юбілею БНР, яна пройдзе на вул. Будзёнага ў 100 кабінеце. Гэта адзін з пунктаў святочнай праграмы, якая запланавана ў Гародні. Нагадаю, у суботу 24-га пройдзе гарадзенская дыктоўка да 25-га сакавіка. У нядзелю ў Каложскім парку будзе вялікае „Свята Незалежнасці” – канцэрт з віншавальнымі выступамі для гарадзенцаў. Запрашаем прыняць удзел.
Пра адметнасць першай імпрэзы, што адбудзецца 23-га сакавіка, распавядае кіраўнік Гарадзенскай абласной рады ТБМ Віктар Парфёненка:
– У плане святкавання мы ўключылі таксама ўганараванне папулярызатараў беларускай мовы і літаратуры. Узнагароджаны некаторыя людзі незаангажаваныя ў беларускі нацыянальны рух, але якія сталі актыўна ўжываць беларускую мову ў паўсядзённым жыцці і ў сваёй прафесіі. Ад імя Таварыства беларускай мовы ім будуць падараваныя падарункі. Плануем правесці конкурс на лепшы нацыянальны строй сярод удзельнікаў вечарыны.
Чакаецца, што на літаратурнай вечарыне 23-га сакавіка выступяць як прафесійныя гісторыкі, так і літаратары, якія прадставяць новы нумар часопіса Гарадзенскай філіі Саюза Беларускіх пісьменнікаў „Новы Замак”.
Беларускае Радыё Рацыя, Гародня
